Salla takon blegtorët, nuk jep zgjidhje për naftën; subvencionet do jenë të njëjta
Ministri i Bujqësisë dhe Zhvillimit Rural, Andis Salla, së bashku me Ministrin e Financave, Petrit Malaj, kanë zhvilluar një takim në Ministrinë e Bujqësisë dhe Zhvillimit Rural me një delegacion prej 15 fermerësh. Delegacioni përfaqësonte protestën e organizuar gjatë ditës, me qëllim dëgjimin dhe diskutimin nga afër të shqetësimeve, sfidave konkrete në terren dhe çështjeve që lidhen me sektorin.
Sipas një njoftimi për shtyp të Ministrisë së Bujqësisë, ministri Salla nuk ka ofruar një përgjigje konkrete ndaj kërkesës së blegtorëve për kthimin e naftës pa akcizë dhe rritjen e subvencioneve, duke përfshirë heqjen e kufirit maksimal.
Megjithatë, ministri Salla bëri të ditur se përmes Skemës Kombëtare të këtij viti, e cila është hartuar duke u bazuar në nevojat e terrenit, blegtorët do të përfitojnë mbështetje të shtuar. Kjo përfshin rritjen e pagesave direkte:
- Nga 10,000 lekë në 12,000 lekë për lopë.
- Nga 1,200 lekë në 1,500 lekë për kafshë të imta (dele dhe dhi).
- Nga 1,000 lekë në 2,000 lekë për kosherë bletësh.
Gjithashtu, për herë të parë, do të përfshihet mbështetje për derrin dhe do të përgjysmohen pragjet minimale për përfitim:
- 5 krerë lopë.
- 50 krerë kafshë të imta.
- 25 koshere bletësh.
Lidhur me mbështetjen financiare, ministri Salla theksoi se në vitin 2025, vlera totale e përfituar nga pagesat direkte për blegtorinë arriti rreth 2.5 miliardë lekë. Për vitin 2026, parashikohet një rritje në rreth 4 miliardë lekë, pjesërisht falë shtesave të fondit nga aktet normative gjatë vitit.
Përveç kësaj, për herë të parë, fermerët prodhues të qumështit do të përfitojnë 10% të vlerës së faturave të shitjes. Ky mekanizëm mbështetës, i jashtëm Skemës Kombëtare, ka për qëllim të nxisë formalizimin dhe të mbështesë prodhimin vendas.
Gjatë protestës së sotme, fermerët kërkuan kthimin e skemës së naftës pa akcizë, si një mënyrë për të lehtësuar kostot, dhe rritjen e subvencioneve deri në 15 mijë lekë për kokë, pa kufizuar numrin e tyre në ferma.