“`html
Shtrenjtimi i tarifave bën që bankat e shkollave private të jenë më të zbrazëta; ku po shkojnë nxënësit?
Viti i ri shkollor ka sjellë rritje të shpenzimeve për familjet që kanë zgjedhur arsimin privat. Disa shkolla private, në fillim të vitit të ri shkollor, kanë shtrenjtuar tarifat e shkollimit me 15 deri në 20%. Kjo rritje e tarifës është aplikuar për të tre ciklet e studimeve: fillore, nëntëvjeçare dhe të mesme.
Shkak i shtrenjtimit është bërë i ditur rritja e pagave të mësuesve dhe kostoja e transportit, e cila është rritur si pasojë e shtrenjtimit të naftës. Megjithatë, pasojat e këtij shtrenjtimi nuk janë ndjerë vetëm në buxhetin e familjeve. Në disa shkolla private, rritja e tarifave ka sjellë edhe largimin e një numri të konsiderueshëm nxënësish drejt shkollave publike.
Mësuesit pohojnë se, bazuar edhe në sondazhet e kryera me prindërit, arsyeja kryesore e këtyre largimeve është pikërisht rritja e kostos së shkollimit. Në shkollat private, tarifa totale përbëhet nga tre elementë kryesorë: tarifa e studimit, ushqimit dhe transportit.
Për shembull, në një nga shkollat private, tarifa totale mujore që një prind paguante për një fëmijë të ciklit fillor ishte:
- 15,000 lekë për studimin
- 5,000 lekë për transportin
- 6,000 lekë për ushqimin
Në total, kjo arrinte në 26,000 lekë në muaj. Pas rritjes, tarifa mujore e studimit arriti në 19,000 lekë, transporti në 6,000 lekë dhe tarifa e ushqimit në 7,000 lekë. Në total, tarifa e re arriti në 31,000 lekë në muaj, duke shënuar një rritje prej 5,000 lekësh, ose rreth 19% në muaj.
Për një familje me dy fëmijë, me rritjen e tarifave, kostoja e shkollimit bëhet e papërballueshme. Kjo ka sjellë që, në disa shkolla private, largimi i nxënësve të arrijë nga 3 deri në 7 nxënës për klasë. Në shkollat private, numri i nxënësve varion nga 15 deri në 20 nxënës për klasë. Në një klasë me 20 nxënës, 7 të larguar përbëjnë gati 35% të largimeve.
Edhe në një shkollë private të ciklit fillor, prindërit pohojnë se rritja e tarifës vjetore me 500 euro, ose 15% më shtrenjtë, ka ndikuar në vendimin për të larguar fëmijën në një shkollë publike.
Një element tjetër është edhe zgjerimi i shërbimit “pas shkolle” në arsimin shtetëror, i cili u mundëson prindërve që fëmijët të qëndrojnë më gjatë në ambientet e shkollës, edhe pas përfundimit të orarit mësimor. Ky është ende një projekt pilot që po zbatohet në disa klasa. Ky shërbim përfshin edhe kohën e studimit dhe është kthyer në një nga avantazhet që kanë pasur shkollat private, duke bërë që shumë prindër t’i zgjedhin ato për shkak të orareve më të gjata.
Megjithatë, programi publik ende nuk përfshin ofrimin e vaktit të drekës, një shërbim që do të kishte një kosto të konsiderueshme për buxhetin. Nga Ministria e Arsimit llogaritet se nëse ky program do të zbatohej për të gjithë sistemin nëntëvjeçar në vend (nga klasat e para deri në klasat e nënta), kostoja vjetore arrin rreth 203 milionë euro në vit.
“`