Tensionet mes Uashingtonit dhe Karakasiit përshkallëzohen!
Shtetet e Bashkuara të Amerikës kanë sekuestruar një anije cisternë në ujërat ndërkombëtare, pranë brigjeve të Venezuelës, sipas informacioneve të zyrtarëve amerikanë për CBS. Ky është sekuestrimi i dytë i një anijeje pranë brigjeve të Venezuelës brenda këtij muaji.
Ky veprim vjen pas deklaratës së Presidentit amerikan, Donald Trump, të martën, ku ai njoftoi urdhrin për një “bllokadë” ndaj cisternave të naftës, të cilat janë nën sanksione, në hyrje dhe dalje nga Venezuela.
Venezuela nuk ka reaguar ende zyrtarisht lidhur me këtë konfiskim të fundit nga SHBA-të. Megjithatë, më parë, vendi ka akuzuar Uashingtonin për përpjekje për të vjedhur burimet e saj të naftës.
Operacioni u drejtua nga Garda Bregdetare e SHBA-së, ngjashëm me operacionin e mëparshëm të zhvilluar këtë muaj, siç raporton CBS. Anija u ngjit në bord nga një ekip special taktik.
Në javët e fundit, SHBA-të kanë shtuar praninë e tyre ushtarake në Detin Karaibe. Ata kanë kryer operacione kundër anijeve të dyshuara për trafik droge nga Venezuela, ku raportohet se humbën jetën rreth 100 persona. SHBA-të nuk kanë paraqitur prova publike se këto anije transportonin drogë dhe ushtria është nën shqyrtim gjithnjë e më të madh nga Kongresi për shkak të këtyre sulmeve.
SHBA-të e kanë akuzuar Presidentin venezuelian, Nicolás Maduro, se drejton një organizatë të shpallur terroriste, të njohur si “Cartel de los Soles”, akuzë të cilën ai e ka mohuar. Administrata Trump pretendon se ai dhe grupi i tij përdorin naftë të “vjedhur” për të “financuar veten, terrorizmin e drogës, trafikimin e qenieve njerëzore, vrasjen dhe rrëmbimin”.
Venezuela, e cila zotëron rezervat më të mëdha të provuara të naftës në botë, varet në masë të madhe nga të ardhurat e eksporteve të naftës për të financuar shpenzimet qeveritare.
Njoftimi i Trump për një “bllokadë” erdhi më pak se një javë pasi SHBA-të sekuestruan një anije cisternë nafte, që dyshohet se i përkiste një “flote fantazmë” në brigjet e Venezuelës dhe që përdorte metoda të ndryshme për të fshehur veprimtarinë e saj.
Shtëpia e Bardhë deklaroi se anija në fjalë, e quajtur Skipper, ishte e përfshirë në “transportin e paligjshëm të naftës” dhe do të dërgohej në një port amerikan. Qeveria venezueliane e ka kritikuar këtë veprim, ndërsa Maduro ka thënë se SHBA-të “rrëmbyen ekuipazhin” dhe “vodhën” anijen.