“`html
“Tigrat” e Vlorës nxorën vetëm 1% të energjisë dhe kushtuan miliona euro qira
Kur kriza energjetike u bë e dukshme në fund të vitit 2021, qeveria shqiptare nisi një procedurë për të marrë me qira asete termike për prodhimin e energjisë me naftë. Kjo iniciativë rezultoi me vendosjen e dy termocentraleve lundrues, të quajtur “Dy Tigra”, në Vlorë në vjeshtën e vitit 2022. Në atë kohë, blerja e tyre justifikohej me çmimet rekord të energjisë, të cilat arritën kulmin në gusht 2022.
Megjithatë, ndërsa vitet kanë kaluar dhe kriza energjetike është zbehur, këto dy termocentrale lundrues nuk janë përdorur kurrë në kapacitet të plotë për të justifikuar koston e tyre miliona euroshe, një shifër e cila nuk është bërë kurrë zyrtarisht e qartë.
Të dhënat e fundit nga Enti Rregullator i Energjisë tregojnë se në vitin 2025, dy termocentralet prodhuan vetëm 77 mijë MWh energji. Kjo sasi përfaqëson vetëm 1% të prodhimit neto vendas, i cili ishte 7.44 milionë MWh.
Këto termocentrale raportohen si pjesë e aseteve nën menaxhimin e KESH sh.a., e cila zotëron gjithashtu tre hidrocentrale të Kaskadës së Lumit Drin, Termocentralin e Vlorës dhe impiantin fotovoltaik “Qyrsaq”. Kapaciteti total i instaluar i KESH sh.a. arrin rreth 1,563 MW, duke përfshirë 1,350 MW nga hidrocentralet, 98 MW nga TEC Vlora, 110 MW nga termocentralet lundrues “Tigri 1” & “Tigri 3” dhe kapacitetin e impiantit fotovoltaik.
Kostoja e lartë e prodhimit të energjisë
Prodhimi i energjisë nga gjeneruesit termikë ka qenë gjithmonë më i shtrenjtë krahasuar me format e tjera të prodhimit, duke e bërë të paqëndrueshme një investim të tillë. Një skenar i situatës energjetike për vitin 2023 parashikonte se prodhimi i energjisë nga këto njësi do të kushtonte 165 milionë euro. Gjeneruesit pritej të prodhonin 884 GWh me një kosto prej 185 euro/MWh, por kjo nuk u realizua.
Vlera e gjeneruesve termikë vlerësohet në 15 milionë euro, ndërsa qiraja për një periudhë 2-vjeçare arrinte në 46 milionë dollarë. Kjo shifër tashmë është rritur ndjeshëm, duke marrë parasysh që afati i qëndrimit të gjeneruesve në Vlorë ka kaluar.
“`