Tornado vret të paktën gjashtë persona, lë gjurmë shkatërrimi në Brazil
Një tornado i fuqishëm ka përshkuar Brazilin jugor, duke lënë pas të paktën gjashtë të vdekur dhe rreth 750 të plagosur, sipas autoriteteve lokale.
Më shumë se 1,000 banorë kanë humbur shtëpitë e tyre në këtë stuhi, e cila goditi shtetin e Paraná-s me erëra që arritën deri në 250 kilometra në orë. Këto të dhëna janë raportuar nga agjencia e mbrojtjes civile, e cituar nga portali i lajmeve G1.
“Ekipet tona thanë se gjetën një skenë të ngjashme me një zonë lufte”, citoi G1 zëvendësshefin e zjarrfikësve të Paraná-s, Jonas Emmanuel Benghi Pinto.
Qyteti i vogël Rio Bonito do Iguaçu, me një popullsi prej rreth 14,000 banorësh, u godit më rëndë të premten pasdite. Guvernatori Ratinho Júnior njoftoi se rreth 90% e ndërtesave të qytetit u shkatërruan, duke bërë të nevojshme shpalljen e gjendjes së jashtëzakonshme.
Dhjetëra mijëra familje në të gjithë shtetin e Paraná-s mbetën përkohësisht pa energji elektrike. Pamjet nga dronët treguan lagje të tëra të kthyer në rrënoja.
“Tornado zgjati 30 ose 40 sekonda dhe shkatërroi gjithçka”, tha një banor për TV Globo. “Duket sikur kishte shpërthyer një bombë atomike”.
Shërbimet e emergjencës ngritën një spital fushor për të trajtuar të plagosurit, ndërsa ekipet e shpëtimit vazhduan kërkimet për njerëz që dyshohet se janë bllokuar nën rrënoja. Helikopterë dhe personel shtesë nga rajonet fqinje janë dërguar për të ofruar ndihmë, sipas zjarrfikësve.
“Dua të shpreh ngushëllimet e mia më të thella për të gjitha familjet që kanë humbur të dashurit e tyre”, shkroi Presidenti Luiz Inácio Lula da Silva në platformën X, duke premtuar ndihmë të shpejtë. Guvernatori shpalli gjithashtu tre ditë zie.
Tornadot me një intensitet të tillë janë të rralla në Brazil, por ndodhin herë pas here në rajonet jugore të vendit.