“`html
Lirimi i pronarit të lokalit në Crans-Montana, ku humbën jetën 40 të rinj, shkakton krizë diplomatike mes Italisë dhe Zvicrës. Roma: “Vendim i turpshëm”
Italia ka shprehur zyrtarisht protestën e saj ndaj vendimit për lirimin me kusht të Jacques Moretti, pronarit të lokalit në Crans-Montana, ku në orët e para të Vitit të Ri shpërtheu një zjarr vdekjeprurës që mori jetën e 40 personave dhe la të plagosur 116 të tjerë. Vendimi u kundërshtua fuqishëm nga kryeministrja Giorgia Meloni dhe ministri i Jashtëm Antonio Tajani.
Sipas agjencisë italiane të lajmeve ANSA, shuma prej 200 mijë frangash zvicerane, e kërkuar si garanci për lirimin e shtetasit francez, u pagua nga një mik i afërt i tij. Ndaj Moretti u vendosën masa standarde kufizuese, përfshirë ndalimin e daljes nga vendi dhe detyrimin për t’u paraqitur çdo ditë në një stacion policie.
Në një deklaratë zyrtare, qeveria italiane thekson se vendimi u mor nga autoritetet gjyqësore zvicerane “pavarësisht seriozitetit të jashtëzakonshëm të veprës penale për të cilën Moretti dyshohet se mban përgjegjësi, barrës së rëndë të fajit, rrezikut të vazhdueshëm të arratisjes dhe rrezikut të qartë për manipulimin e provave”.
Sipas qeverisë në Romë, “ky vendim i hap sërish plagët familjeve të viktimave të Crans-Montana-s dhe atyre që vazhdojnë të trajtohen në spital”.
“E gjithë Italia ngre zërin dhe kërkon që drejtësia dhe e vërteta të dalin në dritë. Kërkohet që, menjëherë pas kësaj tragjedie, të merren masa të bazuara në respekt, duke marrë plotësisht parasysh dhimbjen dhe pritshmëritë e familjeve të viktimave”, thuhet më tej në deklaratë.
Qeveria Meloni ka thirrur në Romë ambasadorin italian në Zvicër për të koordinuar hapa dhe iniciativa të mëtejshme. Kryeministrja Meloni dhe ministri i Jashtëm Antonio Tajani i kanë dhënë udhëzim ambasadorit që të kontaktojë menjëherë prokuroren e përgjithshme të Kantonit Valais, Béatrice Pilloud, për t’i përcjellë “indinjatën e thellë” të qeverisë italiane për këtë vendim gjyqësor.
Duke komentuar lirimin me kusht kundrejt garancisë financiare, Tajani deklaroi: “Duhet të kuptojmë pse gjyqtarët e Sionit vendosën të lënë të lirë një person që është qartazi i përfshirë në masakrën e Crans-Montana-s dhe që ishte arrestuar pikërisht për shkak të rrezikut të arratisjes. Bëhet fjalë për një tragjedi që mundej dhe duhej të ishte shmangur, dhe lirimi i tij është një turp”.
Shefi i diplomacisë italiane shtoi se “problemi nuk është qeveria zvicerane, por gjyqtarët e Sionit, të cilët shfaqen garantues kur u leverdis dhe pamëshirshëm kur u leverdis po ashtu. Kjo nuk është e pranueshme.” Ai theksoi se ndihet “i zhgënjyer, i fyer dhe i indinjuar si baba dhe si gjysh”, duke e cilësuar vendimin “plotësisht të pakuptueshëm”.
“`