Vakë fëmijërie në Francë: 3-vjeçari gjendet i vdekur në makinë
Një ngjarje e rëndë ka ndodhur në Francë, ku një djalë 3-vjeçar humbi jetën pasi u gjet i mbyllur brenda makinës së familjes në Saint-Gratien, departamenti Val-d’Oise, mes një vale të nxehti që ka përfshirë vendin.
Sipas autoriteteve, fëmija u gjet pa ndjenja në mbrëmjen e së mërkurës nga prindërit e tij, të cilët kishin humbur kontaktet me të. Shërbimet e emergjencës mbërritën menjëherë në vendngjarje dhe tentuan ta ringjallnin, por pavarësisht përpjekjeve, 3-vjeçari u shpall i vdekur.
Hetimet paraprake sugjerojnë se fëmija kishte mbetur pa mbikëqyrje për të paktën 45 minuta. Mendohet se ai ka hyrë vetë në automjetin e parkuar pranë banesës dhe më pas ka mbetur i bllokuar brenda. Në atë kohë, nëna po flinte me foshnjën 18-muajshe të familjes, ndërsa babai punonte në një kasolle në oborr.
Nëna është transportuar në spital në gjendje shoku, ndërsa prokuroria ka nisur një hetim për vrasje nga pakujdesia. Trupi i të miturit është dërguar në institutin mjeko-ligjor për kryerjen e autopsisë.
Kjo ngjarje vjen pak ditë pas një rasti tjetër tragjik në Francë. Më 22 qershor, dy fëmijë të moshës 2 dhe 4 vjeç u gjetën të pajetë brenda makinës së familjes në Carpentras, pasi kishin hyrë në automjet dhe kishin mbetur të bllokuar, ndërsa nëna e tyre ishte e zënë me sistemimin e ushqimeve. Edhe në atë rast, përpjekjet e mjekëve për t’i shpëtuar rezultuan të pasuksesshme.