Tragjedi në New York: 51-vjeçari humb jetën pasi ra gjatë një koncerti
Një burrë 51-vjeçar ka humbur jetën pas një rënieje nga një lartësi e konsiderueshme, ndërsa ndodhej në një koncert në Madison Square Garden, New York City, të shtunën në mbrëmje. Autoritetet lokale njoftuan për ngjarjen tragjike.
Sipas Policisë së New York-ut, ekipet e emergjencës gjetën viktimën, të identifikuar si Paul Cooker nga Connecticut, pa ndjenja dhe me dëmtime të rënda që përputheshin me një rënie nga lartësia. Ai u dërgua menjëherë në spital, por fatkeqësisht u shpall i vdekur.
Autoritetet kanë nisur hetimet për të sqaruar rrethanat e ngjarjes. Deri më tani, përjashtohet mundësia e një akti kriminal.
Raportimet tregojnë se 51-vjeçari ndodhej në koncert së bashku me bashkëshorten e tij për të ndjekur performancën e grupit rock Goose. Në një deklaratë, grupi muzikor u shpreh “thellësisht i tronditur” nga ngjarja.
Grupi Goose njoftoi gjithashtu se koncerti i tyre i planifikuar për të dielën në Central Park do të zhvillohet, ndërsa të ardhurat do të dhurohen për një organizatë bamirësie që mbështet fansat dhe komunitetin e tyre. “Ne menduam me kujdes nëse duhet të performonim sot dhe arritëm në përfundimin se mënyra më e mirë është të qëndrojmë të bashkuar dhe të mbështesim njëri-tjetrin,” thuhet në deklaratën e tyre.