Tragjedi në Sudan: Sulm me dronë dhe raketa në një çerdhe, 50 viktima, përfshirë 33 fëmijë
Një sulm me dron në qytetin Kalogi, në rajonin e Kordofanit Jugor të Sudanit, ka shkaktuar vdekjen e të paktën 50 personave, mes tyre 33 fëmijë. Lajmi u bë i ditur nga Rrjeti i Mjekëve të Sudanit dhe ushtria sudaneze, të cilat akuzuan Forcat e Mbështetjes së Shpejtë (RSF) për përgjegjësinë e sulmit të ndodhur të enjten.
Deri më tani, RSF nuk ka dhënë një reagim zyrtar për akuzat.
Ndërkohë, vetë grupi paramilitar akuzoi ushtrinë sudaneze për një sulm të premten ndaj një tregu dhe një depoje karburanti në pikën kufitare Adre me Çadin, në rajonin e Darfurit. Sipas tyre, kjo zonë përdorej për shpërndarjen e ndihmave dhe furnizimeve tregtare.
Ministria e Jashtme e lidhur me ushtrinë deklaroi se çerdhja në Kalogi u godit dy herë nga raketa të lëshuara nga dronë. Ajo shtoi se civilët dhe mjekët që nxituan në vendngjarje u sulmuan gjithashtu.
Raportet aktualisht nuk mund të verifikohen në mënyrë të pavarur për shkak të situatës së rënduar të sigurisë.
UNICEF reagoi ashpër ndaj sulmit. Zëdhënësi Sheldon Yett e quajti atë “një shkelje të tmerrshme të të drejtave të fëmijëve”, duke theksuar se “fëmijët nuk duhet ta paguajnë kurrë çmimin e konfliktit”. Agjencia u bëri thirrje palëve ndërluftuese të ndalojnë menjëherë sulmet dhe të garantojnë qasje të sigurt për ndihmën humanitare.
Që prej prillit 2023, Sudani është përfshirë në një luftë të përgjakshme për pushtet mes ushtrisë dhe RSF-së, dikur aleatë. Rajonet e Kordofanit – Kordofani i Veriut, Jugut dhe Perëndimit – të shtrira mes kryeqytetit Khartum dhe Darfurit, janë shndërruar në një vijë të përparësishme të konfliktit. Betejat janë ashpërsuar teksa ushtria përpiqet të avancojë drejt Darfurit, duke rrezikuar popullsinë prej rreth tetë milionë banorësh.