VIDEO/ Tragjedi në Indi, 26 persona humbin jetën pas një zjarri në një klub nate
Pamje tronditëse janë publikuar nga momentet e shpërthimit të zjarrit në një klub nate në Indi, ku humbën jetën 26 persona, mes tyre edhe turistë.
Zjarri shpërtheu pas mesnatës së së shtunës drejt të dielës në një klub që ishte pjesë e një hoteli në Arpora, në rajonin North Goa, sipas policisë dhe agjencisë së lajmeve Press Trust of India (PTI).
Lajmi u konfirmua nga kreu i qeverisë së shtetit, Pramod Sawant, i cili theksoi se mes viktimave kishte “tre deri në katër” turistë. Nuk është sqaruar ende nëse mes tyre kishte të huaj dhe cilat ishin kombësitë e tyre.
Kryeministri i shtetit ka urdhëruar nisjen e një hetimi për të përcaktuar shkaqet e tragjedisë dhe për të verifikuar nëse ishin respektuar rregullat e sigurisë kundër zjarrit dhe kodet e ndërtimit. Ai shtoi se “përgjegjësit do të përballen me pasojat më të rënda ligjore. Çdo neglizhencë do të trajtohet me ashpërsi”.
Sipas Sawant, tre persona humbën jetën nga djegiet, ndërsa të tjerët nga asfiksia.
Pamjet e PTI tregojnë ekipet e shpëtimit duke nxjerrë të plagosur ose të vdekur me barela, duke zbritur një shkallë të ngushtë prej guri drejt klubit “Birch”, ku gjendeshin policë, ekipe ndihme dhe qytetarë. Në pamje më të gjera duken re tymi që ngrihen mbi vendin e ngjarjes.
Shefi i qeverisë lokale deklaroi se “ky aksident tragjik nuk duhet të kishte ndodhur kurrë”, pasi “lokali funksiononte pa licencë” dhe “pikërisht kjo pakujdesi shkaktoi zjarrin”.
Sipas raportimeve të Indian Express dhe mediave të tjera, një nga shkaqet e mundshme të zjarrit ishte shpërthimi i një bombole gazi të përdorur në kuzhinë. Megjithatë, shefi i zjarrfikësve në Goa, Nitin V. Raitkar, tha për CNN News18 se “shumica e njerëzve vdiqën nga asfiksia në bodrum dhe kuzhinë”, pasi “një shfaqje me fishekzjarre i vuri flakën pjesëve prej druri të lokalit duke e mbushur atë me tym”.
Goa priti mbi dhjetë milionë turistë në vitin 2024, mes tyre rreth 470 mijë të huaj, sipas të dhënave zyrtare. Zjarret në Indi janë të shpeshta, pasi infrastruktura është shpesh në gjendje të keqe dhe rregullat e sigurisë zbatohen me përjashtime.