Pas një greve urie 23-ditore, Pano Ruçi ka fituar betejën për të detyruar autoritetet greke të rihapin hetimin mbi tragjedinë e trenave në Tempi, ku humbën jetën 57 persona, mes tyre edhe djali i tij 23-vjeçar, Denis Ruçi. Tragedia nxori në pah neglizhencën dhe keqmenaxhimin e sistemit hekurudhor grek.
Hetimi zyrtar fillestar, i cili u mbyll në fund të gushtit, ka lënë shumë pyetje pa përgjigje, veçanërisht lidhur me atë që transportonte treni i mallrave dhe shkakun e zjarrit pas përplasjes. Edhe pse 36 persona përballen me akuza, të afërmit e viktimave dyshojnë në versionin zyrtar.
Pano Ruçi kërkoi zhvarrosjen e trupit të djalit të tij dhe kryerjen e testeve toksikologjike, të cilat nuk u kryen në hetimin fillestar. Greva e tij e urisë mori vëmendje kombëtare dhe shtoi presion mbi shtetin. Si rezultat, më 7 tetor, prokurorët pranuan kërkesat e tij, duke hapur një hetim të ri paraprak mbi mungesat ose parregullsitë e mundshme në hetimin fillestar.
Ky akt i Ruçit u mbështet nga publiku dhe figura të larta, por u shoqërua edhe me kritika nga disa ministra, të cilët kundërshtuan mënyrën se si po trajtohej kërkesa. Pavarësisht vështirësive, Ruçi shprehet i vendosur për të zbardhur të vërtetën e plotë, duke theksuar se “nuk kemi mbaruar ende, sepse kemi një rrugë të gjatë për të bërë.”