“`html
Turizmi Dentar Po Rrit Tregun, Inspektorët Zbulojnë Mangësi në Klinikat Dentare
Rritja e shpejtë e numrit të klinikave dentare në vend, e nxitur edhe nga kërkesa në rritje për turizëm dentar, po shoqërohet me një vëmendje më të shtuar nga ana e inspektorëve ndaj standardeve të funksionimit.
Gjatë vitit 2025, trupat inspektuese të Inspektoratit Shtetëror Shëndetësor kanë kryer 1,206 inspektime dhe riinspektime në kabinetet dhe laboratorët dentarë publikë dhe jopublikë. Nga këto, 1,162 ishin inspektime të zakonshme dhe 44 ishin riinspektime. Si rezultat i këtyre kontrolleve, janë vendosur 5 gjoba, 6 masa urgjente dhe 20 paralajmërime.
Këto kontrolle vijnë në një moment kur shërbimet dentare po kthehen gjithnjë e më shumë në një aktivitet me peshë ekonomike, duke tejkaluar rolin e tyre si shërbim bazë shëndetësor. Shqipëria është shndërruar në vitet e fundit në një destinacion të preferuar për turizmin shëndetësor, veçanërisht atë dentar. Pacientë kryesisht nga Italia vijnë në Shqipëri, të tërhequr nga çmimet më të ulëta dhe kostot e favorshme të qëndrimit.
Sipas të dhënave të tregut, shërbimet dentare në Shqipëri janë rreth 35-40% më të lira krahasuar me vendet e tjera europiane. Operatorë të mëdhenj të këtij segmenti kanë shënuar zgjerim të aktivitetit dhe të ardhurave në vitet e fundit.
Statistikat tregojnë se Tirana mbetet qarku me numrin më të madh të kontrolleve, duke regjistruar 410 inspektime, 4 riinspektime, 3 gjoba, 2 vendime për masa urgjente dhe 7 paralajmërime. Pas Tiranës, renditen Durrësi me 126 inspektime dhe 5 riinspektime, si dhe Shkodra me 111 inspektime dhe 25 riinspektime.
Durrësi është një nga qarqet ku janë konstatuar më shumë masa administrative, me 1 gjobë, 3 vendime për masa urgjente dhe 6 paralajmërime. Kjo situatë sugjeron se presioni i kërkesës dhe zgjerimi i aktivitetit po kërkojnë një mbikëqyrje më të fortë.
Mangësitë kryesore të konstatuara nga inspektorët përfshijnë:
- Mungesën e dokumentacionit higjieno-sanitar dhe shëndetësor, si akt miratimi higjieno-sanitar, certifikata DDD, analiza e ujit të pijshëm, librezat shëndetësore të personelit dhe dokumentacioni përkatës për menaxhimin e mbetjeve.
- Raste të mos-rinovimit të lejes së ushtrimit të profesionit nga mjekët.
- Hapësira të pamjaftueshme për aktivitetin.
- Mungesë ambientesh për magazinimin e përkohshëm të mbetjeve spitalore.
Këto probleme marrin rëndësi më të madhe në kushtet kur tregu dentar është zgjeruar ndjeshëm vitet e fundit. Sipas një artikulli të mëparshëm, vetëm gjatë vitit 2019, regjistrit të stomatologëve të licencuar iu shtuan 710 mjekë të rinj, duke e çuar numrin total në 2,163 në fund të atij viti, nga 1,453 që ishte në fillim të tij. Ky zgjerim i ofertës, i kombinuar më pas me bumit e turizmit dentar, ka ndihmuar në shumëfishimin e klinikave dhe laboratorëve, veçanërisht në Tiranë dhe në zonat me akses më të lehtë për të huajt.
“`