Trump tregon vizionin për një Amerikë “më të fortë”, nga ekuilibri bërthamor te imigracioni, paralajmëron Hamasin
Presidenti i Shteteve të Bashkuara, Donald Trump, në një intervistë për emisionin “60 Minutes” të CBS, trajtoi një sërë çështjesh të politikës së jashtme dhe të brendshme. Duke filluar nga marrëdhëniet SHBA-Izrael dhe Hamasi, e deri te ekuilibri bërthamor dhe imigracioni, udhëheqësi amerikan paraqiti vizionin e tij për një Amerikë “më të fortë dhe më të vendosur”.
Ai iu referua gjerësisht Kinës, udhëheqësit të saj Xi Jinping dhe marrëdhënieve Uashington-Pekin, duke shfaqur një përzierje paralajmërimesh dhe deklaratash të kujdesshme lidhur me ekuilibrin gjeopolitik në Azi.
Trump zbuloi se i ka kërkuar “Departamentit të Luftës” të përgatitet për rifillimin e testimeve bërthamore, duke argumentuar se “Shtetet e Bashkuara duhet të ruajnë epërsinë” ndaj fuqive të tjera. Në të njëjtën kohë, ai theksoi se vendi disponon “fuqi bërthamore të aftë të shkatërrojnë botën 150 herë” dhe se kërkon një “ekuilibër të ri parandalimi” me Rusinë dhe Kinën.
“Rusia po teston, dhe Kina po teston, por ata nuk po flasin për këtë,” argumentoi republikani. “Ne do të testojmë armë bërthamore, siç po bëjnë vendet e tjera. Koreja e Veriut po teston. Pakistani po teston,” vazhdoi ai. “E dini, sado të fuqishëm që janë (armët bërthamore), bota është e madhe. Nuk e dini domosdoshmërisht se ku po testojnë. Ata po testojnë nën tokë, thellë, ku bota nuk e di vërtet se çfarë po ndodh. Ndjen një dridhje të vogël. Ata po testojnë dhe ne jo. Ne duhet ta bëjmë,” këmbënguli Trump.
Armëpushimi në Gaza nuk është i brishtë
Presidenti amerikan e bëri të qartë se armëpushimi që ai ndërmjetësoi në Gaza “nuk është i brishtë” dhe theksoi se Hamasi do të “asgjësohet” nëse nuk çarmatoset.
“Nuk është i brishtë. Është shumë i qëndrueshëm”, tha presidenti amerikan në emisionin “60 Minutes”. “Hamasi mund të neutralizohet menjëherë nëse nuk sillet siç duhet.”