Zbuten tensionet mes palëve, Trump flet me presidentin e Kolumbisë dhe e fton në Shtëpinë e Bardhë
Presidenti i Shteteve të Bashkuara, Donald Trump, e ka ftuar udhëheqësin kolumbian Gustavo Petro në Shtëpinë e Bardhë. Ky zhvillim vjen disa ditë pasi Trump e akuzoi Petro për trafik kokaine dhe kërcënoi me veprime ushtarake kundër qeverisë së tij.
Ulja e papritur e tensioneve të mërkurën pasoi një telefonatë njëorëshe mes Trump dhe Petro. Gjatë bisedës, të dy udhëheqësit diskutuan “situatën e drogës” dhe “mosmarrëveshje të tjera”, sipas presidentit të SHBA-së.
Kjo ishte telefonata e tyre e parë që nga kërcënimi i Trump për një operacion ushtarak në Kolumbi, pas arrestimit të Presidentit venezuelian Nicolas Maduro nga SHBA-të në një operacion në Karakas. Paralajmërimet e Trump shtynë Petro të bënte thirrje për kolumbianët që të dilnin në rrugë për të mbrojtur sovranitetin e tyre.
Trump shkroi në platformën e tij Truth Social se ishte “një nder i madh të bisedoja me Presidentin e Kolumbisë, Gustavo Petro, i cili më telefonoi për të shpjeguar situatën e drogës dhe mosmarrëveshjet e tjera që kemi pasur”. Ai shtoi se “e vlerësoi telefonatën dhe tonin e tij dhe mezi pret ta takoj në të ardhmen e afërt”.
Presidenti amerikan shtoi se “po bëhen marrëveshje” për një takim në Uashington mes tij dhe Petro, por nuk dha një datë specifike.
Petro, presidenti i parë i krahut të majtë i Kolumbisë, iu drejtua demonstruesve në Plaza Bolivar të Bogotës pas telefonatës me Trump. Ai tha se një ulje e tensioneve ishte duke u zhvilluar dhe se iu desh ta ndryshonte fjalimin e tij në minutën e fundit. “Nëse nuk flasim, ka luftë. Historia e Kolumbisë na e ka mësuar këtë”, tha ai.