FOTOLAJM: Trump ndoqi në kohë reale operacionin e arrestimit të Maduros, Shtëpia e Bardhë publikon pamjet nga Mar-a-Lago
Shtëpia e Bardhë ka publikuar sot një seri fotografish nga rezidenca e presidentit amerikan, Donald Trump, në Mar-a-Lago. Në këto pamje, shihet presidenti Trump dhe ekipi i tij duke ndjekur në kohë reale operacionin “Absolute Resolve”, i cili çoi në arrestimin e presidentit venezuelian Nicolás Maduro dhe bashkëshortes së tij nga forcat speciale Delta Force në Karakas.
Në imazhe, Trump paraqitet pa kravatë, me sakko dhe këmishë të bardhë, duke i kushtuar vëmendje të veçantë çdo zhvillimi të aksionit. Në një nga fotot, pranë tij shihet sekretari i Shtetit, Marco Rubio. Një tjetër imazh, bardhë e zi, thekson rëndësinë historike të momentit.
Presidenti Trump e përshkroi operacionin si “mahnitës, një punë e jashtëzakonshme, sikur të shikoje një shfaqje televizive”, duke theksuar fokusin dhe përfshirjen e tij të drejtpërdrejtë gjatë aksionit.
Fotot nënvizojnë rolin personal të presidentit në drejtimin dhe mbikëqyrjen e këtij operacioni historik, i cili ka pasur një ndikim të konsiderueshëm në skenën politike ndërkombëtare.