Presidenti i Shteteve të Bashkuara, Donald Trump, do të zhvillojë një vizitë prej 4 orësh në Izrael ditën e hënë. Sipas burimeve, axhenda e tij përfshin takime me kryeministrin izraelit, Benjamin Netanyahu, si dhe me familjet e personave të marrë peng. Trump do të mbajë gjithashtu një deklaratë publike në parlamentin izraelit.
Presidenti amerikan pritet të mbërrijë në Izrael në orën 09:20 të mëngjesit dhe të largohet në orën 13:00, sipas një programi që nuk është konfirmuar ende zyrtarisht. Menjëherë pas zbarkimit në aeroportin Ben Gurion, do të mbahet një ceremoni e shkurtër mirëseardhjeje. Më pas, Trump do të udhëtojë drejt parlamentit izraelit për një fjalim të planifikuar në orën 11:00.
Para fjalimit, Trump do të zhvillojë një takim dypalësh me kryeministrin Netanyahu në zyrën e këtij të fundit brenda parlamentit. Pas këtij takimi, dy liderët do të bashkohen me familjet e pengjeve në sallën “Shagal” të Knesset-it, sipas të njëjtit burim.