Trump nuk e përjashton mundësinë e dërgimit të trupave amerikane në terren në Venezuelë
Duke iu përgjigjur pyetjeve të gazetarëve në Zyrën Ovale gjatë një aktiviteti mbi FIFA-n, Presidenti Donald Trump u pyet në lidhje me situatën në Venezuelë.
“E kuptoj që nuk doni të jepni prova, por a ka ndonjë gjë që jeni gati ta përjashtoni në këtë pikë? A po e përjashtoni mundësinë e dërgimit të trupave amerikane në terren?”, pyeti gazetari.
“Jo, nuk e përjashtoj këtë. Nuk përjashtoj asgjë”, u përgjigj Trump. “Thjesht duhet të kujdesemi për Venezuelën.”
Trump është informuar mbi opsionet e përditësuara për operacione të mundshme ushtarake në Venezuelë, duke përfshirë një sulm tokësor, raportoi të premten ABC News. Të dielën, Trump sugjeroi se administrata e tij mund të jetë e hapur për bisedime me Presidentin Nicolas Maduro.