Trump paralajmëron Iranin: Do të shkatërrohet nëse orkestron vrasjen time
Presidenti i Shteteve të Bashkuara, Donald Trump, ka lëshuar një paralajmërim të ashpër ndaj Iranit, duke theksuar se vendi do të “fshihej nga harta” nëse do të orkestronte vrasjen e tij. Ky reagim vjen pas deklaratave kërcënuese nga një gjeneral iranian.
Trump u shpreh gjatë një interviste për rrjetin televiziv News Nation: “Kam dhënë urdhra shumë të qarta. Nëse ndodh diçka, ata do të fshihen nga faqja e dheut”.
Deklarata e presidentit amerikan erdhi si kundërpërgjigje ndaj gjeneralit iranian Abolfazl Shekarchi, i cili kishte paralajmëruar se presidenti amerikan do të vritej nëse Uashingtoni sulmonte udhëheqësin suprem të Iranit, Ajatollah Ali Khamenei. Shekarchi deklaroi për mediat shtetërore iraniane: “Trump e di se nëse ngrihet një dorë kundër udhëheqësit tonë, ne nuk do ta presim atë dorë. Këto nuk janë fjalë boshe”.
Trump ka shprehur më parë kundërshtimin e tij ndaj shtypjes së protestave masive që shpërthyen në Iran më 28 dhjetor, duke sugjeruar mundësinë e ndërhyrjes ushtarake.
Në diasporën iraniane, disa personalitete, përfshirë fituesen e Çmimit Nobel për Paqen 2003, Shirin Ebadi, kanë bërë thirrje për veprime të synuara nga Uashingtoni kundër udhëheqjes iraniane, sidomos kundër Ajatollah Ali Khamenei-t.
Ky nuk është kërcënimi i parë nga Trump drejtuar Iranit. Menjëherë pas marrjes së detyrës, ai kishte deklaruar se do ta “shkatërronte” Iranin në rast të ndonjë sulmi ndaj jetës së tij.