Trump paralajmëron Iranin: “Do të ndodhin gjëra të këqija” nëse nuk arrihet marrëveshja
Presidenti i SHBA-së, Donald Trump, ka paralajmëruar për të disatën herë se nëse nuk arrihet një marrëveshje mes Shteteve të Bashkuara dhe Iranit, “ndoshta do të ndodhin gjëra të këqija” për Republikën Islamike. Ky veprim vijon përpjekjet e SHBA-së për të ushtruar presion mbi Teheranin, duke përmendur edhe shtypjen e përgjakshme të protestave të zhvilluara në janar.
Uashingtoni, i cili nuk e përjashton opsionin ushtarak, ka vendosur forca të fuqishme ajrore në rajonin e Gjirit. Trump u kujtoi gazetarëve dje se kjo “fuqi e madhe” do të jetë “atje së shpejti”.
“Nuk do t’ju tregoj se çfarë vendosa (për Iranin). Do të doja të përfundoja një marrëveshje përmes negociatave. Tani për tani po flasim me ta, po flasim me Iranin dhe nëse mund të arrijmë një marrëveshje, do të jetë shumë mirë. Nëse nuk mundemi, ndoshta do të ndodhin gjëra të këqija”, shtoi ai.
Irani tha dje se po përgatitej për bisedime me Uashingtonin, veçanërisht mbi programin e energjisë bërthamore të vendit, pas disa javësh shkëmbimesh kërcënimesh.