Trump: Subvencione për kompanitë e naftës për rindërtimin e energjisë në Venezuelë
Presidenti i Shteteve të Bashkuara, Donald Trump, ka lënë të hapur mundësinë e ofrimit të subvencioneve për kompanitë amerikane të naftës, me qëllim rindërtimin e infrastrukturës energjetike në Venezuelë. Ky njoftim vjen në kohën kur Uashingtoni ka zbuluar detaje të reja rreth operacionit ushtarak për kapjen e presidentit të vendit, Nicolas Maduro, një veprim që ka shkaktuar reagime të forta ndërkombëtare.
Në një intervistë për NBC News, Donald Trump deklaroi se qeveria amerikane mund të ofrojë mbështetje financiare për kompanitë e naftës, në mënyrë që ato të rindërtojnë dhe rivendosin në funksionim të plotë infrastrukturën e vjetër energjetike të Venezuelës. Ai vlerësoi se rifillimi i prodhimit mund të arrihet në më pak se 18 muaj.
“Mendoj se mund ta bëjmë në më pak kohë, por do të duhen shumë para,” tha ai. “Do të duhet të shpenzohet një sasi e madhe parash dhe kompanitë e naftës do t’i investojnë ato, për t’u rimbursuar më vonë ose nga qeveria amerikane, ose përmes të ardhurave të ardhshme.”
Trump shmangu specifikimin e kostos totale të nevojshme për përmirësimin e infrastrukturës, por theksoi se “sasi shumë të mëdha parash do të shpenzohen nga kompanitë”, duke shtuar se “ato do të ecin shumë mirë” dhe “vendi do të ecë mirë.”
Një faktor kyç në vendimet e kompanive do të jetë mënyra se si qeveria amerikane do t’i kompensojë ato për investimet e tyre: nëse pagesa do të jetë e menjëhershme apo nëse do të konsiderohet se shlyerja do të bëhet përmes të ardhurave të ardhshme.
Megjithatë, pavarësisht optimizmit të Trump, industria e naftës shfaqet e kujdesshme. Kjo shkaktohet nga historia e shpronësimeve shtetërore në Venezuelë, sanksionet e vazhdueshme të SHBA-së dhe paqëndrueshmëria e re politike.
Presidenti amerikan vlerësoi gjithashtu se shfrytëzimi i rezervave të mëdha të naftës në Venezuelë “do të ndihmojë në uljen e çmimeve të naftës”. Ai theksoi se “një Venezuelë që prodhon naftë është e mirë për Shtetet e Bashkuara, sepse i mban çmimet të ulëta.”
Sipas të dhënave të AAA-së, çmimi mesatar i benzinës në SHBA ishte 2.81 dollarë për galon të hënën, niveli më i ulët që nga marsi 2021.
Në të njëjtën kohë, Sekretari i Mbrojtjes i SHBA-së, Pete Hegseth, zbuloi se gati 200 ushtarakë amerikanë morën pjesë në operacionin e natës nga e premtja në të shtunën në Karakas, me qëllim arrestimin e Nicolas Maduros. Ai sqaroi se më shumë se 150 avionë morën pjesë gjithashtu në operacion.
“Gati 200 amerikanë të shkëlqyer shkuan në qendër të Karakasit dhe arrestuan një të kërkuar nga drejtësia amerikane,” tha ai në një fjalim në Virxhinia, duke konfirmuar se nuk pati viktima mes forcave amerikane.
Megjithatë, sipas një njoftimi kubanez, 32 anëtarë të shërbimeve kubaneze të sigurisë u vranë gjatë sulmit amerikan, duke shtuar kështu më tej tensionin dhe reagimet ndërkombëtare ndaj zhvillimeve në Venezuelë.