Trump ndryshon qëndrim: Nuk do ta takoj Putinin nëse nuk është i gatshëm për marrëveshje
Presidenti amerikan, Donald Trump, ka deklaruar se nuk do të humbasë kohë për t’u takuar me presidentin e Rusisë, Vladimir Putin, nëse lideri i Kremlinit nuk është i gatshëm të bëjë një marrëveshje për t’i dhënë fund luftës në Ukrainë.
“Duhet ta dini se do ta arrijmë një marrëveshje. Nuk do të humbas kohë kot”, u tha Trump gazetarëve më 25 tetor, gjatë udhëtimit të tij drejt Majlazi, ku nisi turneun e tij aziatik.
“Kam pasur gjithmonë marrëdhënie të shkëlqyera me Vladimir Putinin, por kjo ka qenë tepër zhgënjyese. Kam menduar se kjo luftë do të përfundonte para se të arrihej paqja në Lindjen e Mesme”, shtoi ai.
Trump kishte biseduar me Putinin javën e kaluar dhe kishte planifikuar ta takonte atë në Budapest brenda disa javësh. Megjithatë, presidenti amerikan më vonë anuloi takimin, duke thënë se palët do të takoheshin në një datë të mëvonshme.
Ndërkohë, agjencia e lajmeve Reuters citoi një zyrtar amerikan të ketë thënë se administrata Trump ka përgatitur sanksione shtesë kundër ekonomisë ruse, të cilat mund të zbatohen nëse Putin refuzon marrëveshjen për paqe.
Shtetet e Bashkuara kishin tronditur tregjet e energjisë në mbarë botën më 22 tetor, kur njoftuan se do të sanksiononin kompanitë ruse të energjisë, Rosneft dhe Lukoil, të cilat besohet se financojnë luftën e Rusisë në Ukrainë përmes eksporteve të naftës.