Trump: Witkoff do të takohet me Putinin në Moskë javën e ardhshme
I dërguari special i SHBA-së, Steve Witkoff, është planifikuar të takohet me Presidentin rus Vladimir Putin javën e ardhshme në Moskë për të diskutuar planin e SHBA-së për t’i dhënë fund luftës në Ukrainë përmes negociatave, tha të martën Presidenti i SHBA-së Donald Trump. Ai gjithashtu la të kuptohet mundësia që dhëndri i tij të marrë pjesë në takim.
“Steve Witkoff do të jetë atje, ndoshta me Jared (Kushner). Nuk jam i sigurt nëse Jared do të jetë atje, por ai është i përfshirë në proces, është një djalë i zgjuar dhe ata do të takohen me Presidentin Putin, besoj, javën e ardhshme në Moskë”, u tha republikani gazetarëve në Air Force One.
Ai gjithashtu dukej se la mënjanë afatin e nesërm që e kishte dhënë Ukrainës për të pranuar një plan amerikan me 28 pika, duke thënë se “afati për mua është kur të mbarojë lufta”.
Ai vlerësoi gjithashtu se po bëhet përparim në bisedimet me Ukrainën dhe Rusinë dhe siguroi se Moska ka rënë dakord të bëjë lëshime, pa dhënë detaje të mëtejshme.