Turizmi i aventurës, 3.4 milionë euro për të përmirësuar ofertën në 4 fshatra të Korçës
Fondi Shqiptar i Zhvillimit (FSHZH) ka lidhur së fundmi një kontratë për ndërhyrje në katër fshatra të Korçës, me qëllim nxitjen e turizmit të aventurës dhe përmirësimin e ofertës turistike të zonës.
Bëhet fjalë për projektin me titull “Përmirësimi i ofertës turistike të zonave natyrore në rajonin e Korçës, përmes rritjes së aksesueshmërisë dhe infrastrukturës së turizmit të aventurës, në fshatrat Dardhë, Arrëz, Sinicë dhe Nikolicë”. Sipas njoftimit në sistemin e prokurimeve të Bankës Europiane për Rindërtim dhe Zhvillim (BERZH), kontrata u lidh më 26 janar, ndërsa afati për përfundimin e punimeve të parashikuara është 22 marsi 2027. Vlera e kontratës arrin rreth 3.4 milionë euro.
Ky projekt do të zhvillohet në fshatrat Dardhë, Arrëz, Sinicë dhe Nikolicë, të cilat bëjnë pjesë në Bashkinë e Korçës. Rajoni i Korçës karakterizohet nga një klimë kontinentale me ndikime mesdhetare, e cila dallon ndjeshëm nga klima bregdetare për shkak të lartësisë dhe pozicionit të tij në pjesën lindore të Shqipërisë, në një terren malor dhe kodrinor. Ky përshkrim thekson potencialin natyror të zonës që do të përfshihet në këtë ndërhyrje.
Projekti “Infrastruktura dhe Turizmi në Shqipëri” financohet nga Bashkimi Evropian, si përmes asistencës teknike dhe granteve investuese me një vlerë totale prej 40 milionë euro, ashtu edhe nga një hua plotësuese sovrane nga BERZH për Qeverinë e Shqipërisë. FSHZH-ja vepron si agjencia zbatuese e projektit.
Ky nuk është i vetmi rajon që përfiton nga ky projekt. Projekti ka përfshirë vazhdimisht rajone të ndryshme, të cilat janë në faza të ndryshme të zbatimit. Ndër këto, mund të përmenden ndërhyrjet në rrugët turistike të Velipojës, përmirësimi i infrastrukturës dhe transportit në Bogë, ndërhyrja në Parkun Kombëtar të Tomorit, si dhe përmirësimi i infrastrukturës, aksesit dhe mobilitetit në zonën e Labërisë, procedurë e cila u çel vetëm pak ditë më parë.