Turizmi kontribuon në rritjen e të ardhurave të shtetit
Rritja e turizmit në vend ka sjellë një kontribut të rëndësishëm në arkën e shtetit. Të ardhurat totale në buxhet për periudhën janar-korrik arritën në 484.6 miliardë lekë, duke shënuar një rritje prej 11.8% ose 51.1 miliardë lekë më shumë krahasuar me të njëjtën periudhë të vitit të kaluar. Sipas raportit zyrtar të Ministrisë së Financave, këto të ardhura janë realizuar në masën 100% të planifikuar.
Gjatë 7 muajve të parë të vitit, nga Tatimi mbi Vlerën e Shtuar (TVSH) u mblodhën 49 miliardë lekë. Kjo rritje e të ardhurave nga TVSH është e lidhur drejtpërdrejt me rritjen e konsumit, e cila nga ana e saj ndikohet nga fluksi turistik. Të ardhurat nga TVSH-ja e arkëtuar ishin 25.1% më të larta se janar-korrik 2025, duke tejkaluar planin me 1.2 miliardë lekë.
Krahasuar me të njëjtën periudhë të vitit 2025, Tatimet dhe Doganat kanë shënuar një ecuri të mirë, duke kontribuar me 20.8 miliardë lekë më shumë. Gjithashtu, sigurimet shoqërore dhe shëndetësore kanë sjellë 13.9 miliardë lekë më shumë. Pjesa tjetër e rritjes, rreth 16 miliardë lekë, ose një e treta e saj, ka ardhur nga taksat vendore, kryesisht nga arkëtimet për taksën e infrastrukturës për ndërtime të reja.
Gjatë kësaj periudhe, vërehet edhe një rritje e shpenzimeve publike, të cilat arritën në 433.2 miliardë lekë, duke realizuar 98.2% të planit për 7-mujorin. Në krahasim me vitin e kaluar, ky zë është 7.8% më i lartë, ose rreth 31.3 miliardë lekë më shumë. Sipas Ministrisë së Financave, shpenzimet e përgjithshme, në terma vjetorë, janë realizuar në masën 48.8% të planit.
Shpenzimet kapitale arritën në 49.1 miliardë lekë, duke realizuar 96.3% të planit për periudhën. Krahasuar me të njëjtën periudhë të një viti më parë, ky zë është 10.1% më i lartë, ose rreth 4.5 miliardë lekë më shumë.