Udhëheqësi grusht shteti betohet President në Madagaskar
Udhëheqësi i grushtit të shtetit në Madagaskar, Mikael Radraniarina, u betua sot si President i vendit, pasi ushtria mori kontrollin e pushtetit gjatë kësaj jave. Kjo ngjarje pasoi protesta të udhëhequra nga të rinjtë, të cilat çuan në arratisjen e ish-Presidentit Andry Rajoelina. Megjithatë, Rajoelina, kundrejt të cilit Asambleja Kombëtare kishte nisur procedurat e shkarkimit, dënoi marrjen e pushtetit nga ushtria dhe refuzoi të japë dorëheqjen.
Bashkimi Afrikan dhe Sekretari i Përgjithshëm i Kombeve të Bashkuara dënuan grushtin e shtetit. Gjatë ceremonisë së betimit, Radraniarina deklaroi: “Do t’i përmbush plotësisht, tërësisht dhe drejt detyrat e larta të postit tim si President i Republikës së Madagaskarit”. Ai shtoi se do të përkushtohet me të gjitha forcat për mbrojtjen dhe forcimin e unitetit kombëtar dhe të drejtave të njeriut.
Më herët, Radraniarina njoftoi se ushtria kishte marrë pushtetin dhe shpërndarë të gjitha institucionet, me përjashtim të Asamblesë Kombëtare. Ai gjithashtu theksoi se një komitet i udhëhequr nga ushtria do të qeverisë për një periudhë deri në dy vjet, së bashku me një qeveri tranzitore, para se të mbahen zgjedhje të reja.
Radraniarina, ish-komandant i njësisë elitare ushtarake CAPSAT, e cila mori pjesë në grushtin e shtetit të vitit 2009, u përça me Rajoelinën javën e kaluar duke i bërë thirrje ushtarëve të mos qëllonin mbi protestuesit.
Madagaskari ka një popullsi rreth 30 milionë banorë, me një moshë mesatare nën 20 vjeç. Të ardhurat për frymë janë ulur ndjeshëm që nga pavarësia në vitin 1960.
