Udhëheqësi i ri suprem i Iranit kërcënon: T’u heqim sigurinë armiqve tanë!
Udhëheqësi i ri suprem i Iranit, Ajatollah Mojtaba Khamenei, bëri thirrje që armiqve të kombit t’u hiqet “siguria” e tyre. Kjo deklaratë erdhi gjatë fjalimit të tij të parë që pas marrjes së detyrës, ndonëse ai nuk doli publikisht vetë.
Deklarata u lexua në emër të tij nga Presidenti Masud Peskov. Ky njoftim vjen pas vrasjes së Ministrit të Inteligjencës, Esmail Khatib, nga Izraeli.
Mojtaba Khamenei mori postin pas të atit, Ajatollah Ali Khamenei, i cili u nda nga jeta më 28 shkurt në moshën 86-vjeçare, si pasojë e një sulmi ajror izraelit.
Që nga marrja e detyrës, Khamenei nuk është parë publikisht, duke nxitur spekulime rreth gjendjes së tij shëndetësore dhe vendndodhjes.
Media shtetërore iraniane publikoi një video të klerikut 56-vjeçar duke mbajtur mësime fetare për studentë. Megjithatë, nuk u dhanë detaje mbi kohën e xhirimit, duke ngritur dyshime se mund të jetë një material arkivor. Në video, Khamenei shihet duke u drejtuar studentëve në arabisht.
Raportime të ndryshme mediatike sugjerojnë se Khamenei mund të jetë plagosur gjatë sulmeve që u morën jetën edhe gruas dhe fëmijës së tij. Disa media amerikane përshkruajnë gjendjen e tij si të rëndë, madje edhe në komë.
Sipas disa burimeve, ai mund të ketë kërkuar trajtim mjekësor në Moskë.
Pavarësisht mungesës në publik, në emër të Khameneit u bënë thirrje për unitet kombëtar dhe paralajmërime për hakmarrje ndaj përgjegjësve për vrasjen e figurave të rëndësishme të sigurisë, përfshirë Ali Larijanin, i cili vdiq gjatë një bastisje izraelite.
Në një mesazh të postuar në Telegram gjatë funeralit të Larijanit, Khamenei deklaroi: “Çdo pikë gjaku e derdhur ka një çmim dhe vrasësit kriminelë të këtyre martirëve së shpejti do të duhet ta paguajnë atë.”
Ai gjithashtu theksoi se arteria jetësore e Ngushticës së Hormuzit do të mbetet e mbyllur për të ushtruar presion mbi armiqtë e Iranit, duke treguar vendosmërinë e vendit për t’u reaguar ndaj sulmeve kundër udhëheqjes së tij.