Ukraina kërkon import energjie pas sulmeve ruse

Presidenti i Ukrainës, Volodymyr Zelensky, deklaroi se vendi i tij do të ketë nevojë të importojë energji elektrike pas sulmeve të kryera nga Rusia.

Deklarata u bë gjatë një konference të përbashkët për shtyp me Përfaqësuesen e Lartë të Bashkimit Evropian (BE) për Punët e Jashtme dhe Politikën e Sigurisë, Kaja Kallas, në Kiev.

“Nëse do të kemi probleme me energjinë elektrike pas këtij sulmi ose sulmesh të tjera, do të na duhet ta importojmë atë,” tha Zelensky.

Ukraina ka përdorur energji elektrike të importuar në masë të caktuar gjatë dimrave të luftës. Ai gjithashtu theksoi se Rusia ka sulmuar objektet e magazinimit të gazit, furnizimet me ujë dhe një pjesë të konsiderueshme të infrastrukturës së gazit.

Për pasojë, Ukraina ka nisur bisedimet për importin e gazit dhe ka kryer vlerësime për nevojat e saj.