Lufta me Rusinë: Ukraina do të marrë deri në 100 avionë luftarakë Rafale të prodhuar në Francë
Ukraina do të pajiset me deri në 100 avionë luftarakë francezë Rafale F4, si dhe sisteme të përparuara të mbrojtjes ajrore. Kjo marrëveshje e rëndësishme synon të forcojë aftësinë e Kievit për t’u mbrojtur nga sulmet ruse.
Presidenti ukrainas Volodymyr Zelensky e ka cilësuar këtë marrëveshje si “historike”, pasi ai nënshkroi një marrëveshje me homologun e tij francez Emmanuel Macron në një bazë ajrore pranë Parisit.
Dorëzimet e avionëve Rafale F4 pritet të përfundojnë deri në vitin 2035, ndërsa prodhimi i përbashkët i dronëve interceptorë do të fillojë këtë vit. Detajet financiare të marrëveshjes nuk janë bërë ende publike, por raportohet se Franca po planifikon të kërkojë financim nga Bashkimi Evropian dhe gjithashtu të ketë akses në pasuritë e ngrira ruse, një çështje që ka shkaktuar debate brenda bllokut prej 27 anëtarësh.
Në një konferencë të përbashkët për shtyp të mbajtur të hënën, Zelensky tha: “Kjo është një marrëveshje strategjike që do të zgjasë për 10 vjet, duke filluar nga viti i ardhshëm.”
Ai gjithashtu shtoi se Ukraina do të marrë “radarë francezë shumë të fuqishëm”, tetë sisteme mbrojtëse ajrore dhe armë të tjera të avancuara. Zelensky theksoi rëndësinë e këtyre sistemeve, duke thënë se përdorimi i tyre “do të thotë mbrojtja e jetës së dikujt… kjo është shumë e rëndësishme”.
Rusia ka intensifikuar sulmet e saj me dronë dhe raketa kundër Ukrainës në muajt e fundit, duke shënjestruar infrastrukturën energjetike dhe hekurudhore, gjë që ka sjellë ndërprerje masive të energjisë elektrike në të gjithë vendin. Dhjetëra civilë kanë humbur jetën në këto sulme, të cilat Kievi dhe aleatët e tij perëndimorë i kanë cilësuar si krime lufte.
Në një sulm të fundit me raketa ruse gjatë natës, tre persona humbën jetën dhe 15 u plagosën në qytetin verilindor të Balakliya-s, sipas zyrtarëve lokalë.
Duke folur përkrah Zelensky-t, presidenti francez Macron tha: “Po planifikojmë 100 avionë Rafale – kjo është një numër shumë i madh. Kjo është ajo që i nevojitet ushtrisë ukrainase për rigjenerim.” Presidenti francez shtoi se dëshiron ta ndihmojë Ukrainën të përgatitet për çdo zhvillim të ardhshëm.
Këta avionë luftarakë konsiderohen thelbësorë për mbrojtjen e hapësirës ajrore të Ukrainës, pasi vendi aktualisht ka vështirësi në parandalimin e sulmeve ajrore me rreze të gjatë kundër qyteteve dhe qytezave të saj kufitare.