“90% e çështjeve janë zgjidhur”, zbardhen detaje: Trump i pranishëm në Berlin me Zelenskyn përmes një telefonate.
Zyrtarë amerikanë, pas dy ditësh bisedimesh me delegacionin ukrainas, njoftuan se Ukraina do të marrë garanci sigurie të ngjashme me ato të parashikuara nga Neni 5 i Traktatit të NATO-s, duke u bazuar në marrëveshjen e paqes që po diskutohet në Berlin. Ata gjithashtu theksuan se këto garanci nuk do të jenë të përhershme në tryezën e negociatave.
“Besojmë se rusët do t’i pranojnë garancitë në marrëveshjen përfundimtare”, thanë zyrtarët.
Një zyrtar shtoi se Rusia është e hapur ndaj pranimit përfundimtar të Ukrainës në Bashkimin Europian dhe se Presidenti i Shteteve të Bashkuara, Donald Trump, dëshiron të parandalojë zgjerimin rus drejt perëndimit.
Gjatë darkës së liderëve në Berlin, të planifikuar për sonte me Presidentin Zelensky, do të diskutohen hapat e mëtejshëm, ndërsa Presidenti Trump do të marrë pjesë përmes një telefonate, sipas të njëjtave burime.
Lidhur me çështjen territoriale, u theksua se vendimi përfundimtar i takon Kievit dhe se Presidenti Zelensky duhet ta diskutojë këtë çështje me ekipin e tij.
Raportohet se ekziston një “hendek” midis Moskës dhe Kievit në lidhje me termocentralin bërthamor të Zaporizhjes.