Uruguai legalizon eutanazinë për të sëmurët terminalë

Senati i Uruguait ka miratuar një projektligj që legalizon eutanazinë, duke e vendosur vendin mes pak shteteve në Amerikën Latine që e njohin të drejtën për të zgjedhur fundin e jetës në mënyrë të asistuar.

Ligji i ri synon të garantojë të drejtën për t’u “përballur me vdekjen me dinjitet” për të gjithë të rriturit që janë mendërisht të shëndetshëm, por që ndodhen në fazën terminale të një sëmundjeje të pashërueshme ose që vuajnë në mënyrë të padurueshme nga sëmundje të pakthyeshme.

Pas një debati që zgjati mbi 10 orë në senat, projektligji u miratua me mbështetjen e plotë të partisë në pushtet dhe votën pro të disa deputetëve nga partitë e opozitës.

Vendimi u përshëndet nga organizatat për të drejtat e njeriut dhe grupet pro-eutanazisë, ndërsa ka ngjallur debat në qarqet fetare dhe konservatore.