Nancy VanHorn adreson kushtet e pabarabarta të biznesit në Shqipëri
E ngarkuara me Punë e Shteteve të Bashkuara të Amerikës, Nancy VanHorn, ka zhvilluar një takim me Bordin e Dhomës Amerikane të Tregtisë. Sipas Ambasadës së SHBA, VanHorn dhe përfaqësuesit e Dhomës Amerikane kanë diskutuar strategji për rritjen e eksporteve dhe krijimin e kushteve të barabarta për të tërhequr më shumë biznese amerikane në Shqipëri.
Nëpërmjet një postimi në rrjetet sociale, ambasada e SHBA ka dhënë detaje mbi diskutimet. Dhoma Amerikane e Tregtisë është cilësuar si një urë thelbësore midis investitorëve amerikanë dhe Shqipërisë. Ambasada thekson se:
- Duke përfaqësuar 270 kompani anëtare, të cilat gjenerojnë rreth 25 për qind të Prodhimit të Brendshëm Bruto (PBB) të Shqipërisë, Dhoma Amerikane e Tregtisë në Shqipëri shërben si një lidhje e rëndësishme midis investitorëve amerikanë dhe vendit, si dhe një katalizator për rritjen ekonomike.
- E ngarkuara me Punë, Nancy VanHorn, iu bashkua Dhomës Amerikane për të diskutuar strategjinë e saj drejt rritjes së eksporteve dhe investimeve amerikane, si dhe për krijimin e një mjedisi biznesi të favorshëm për të inkurajuar praninë e më shumë kompanive amerikane në Shqipëri.