“Vdekja e Khameneit, moment përcaktues”, kryediplomatja e BE, Kallas: Ka një rrugë të hapur drejt Iranit të lirë
Shefja e politikës së jashtme të Bashkimit Evropian, Kaja Kallas, deklaroi të dielën se vdekja e udhëheqësit suprem të Iranit, Ajatollah Ali Khamenei, shënon “një moment përcaktues në historinë e Iranit”.
“Çfarë vjen më pas është e pasigurt. Por tani ekziston një rrugë e hapur drejt një Irani tjetër, një Iran ku populli i tij mund të ketë më shumë liri për ta formësuar,” u shpreh Kallas në platformën e mediave sociale X.
“Jam në kontakt me partnerët, përfshirë ata në rajon që mbajnë barrën e veprimeve ushtarake të Iranit, për të gjetur hapa praktikë për uljen e tensioneve,” shtoi ajo.
Khamenei u vra të shtunën, sipas mediave shtetërore iraniane, në sulme ajrore izraelite dhe amerikane që shkatërruan kompleksin e tij në qendër të Teheranit.
Presidentja e Komisionit Evropian, Ursula von der Leyen, tha të dielën se zhvilloi një bisedë me Mbretin Abdullah të Jordanisë dhe se Evropa qëndron “në solidaritet të plotë” me Jordaninë pas sulmeve iraniane.
“Me largimin e Khameneit, ka një shpresë të re për popullin e Iranit. Ne duhet të sigurohemi që e ardhmja është e tyre për ta pretenduar dhe formësuar,” theksoi Von der Leyen për X.
“Në të njëjtën kohë, ky moment mbart një rrezik real të paqëndrueshmërisë që mund ta shtyjë rajonin në një spirale dhune,” paralajmëroi ajo.