Washington Post: Venezuela kërkon ndihmë nga Rusia, Kina dhe Irani përballë tensioneve me SHBA-në
Venezuela ka kërkuar mbështetje nga Rusia, Kina dhe Irani për të forcuar aftësitë e saj mbrojtëse, në mes të përplasjeve të vazhdueshme me Shtetet e Bashkuara të Amerikës. Këtë e ka raportuar gazeta Washington Post të premten, duke u bazuar në dokumente të qeverisë amerikane.
Sipas gazetës, presidenti venezuelian, Nicolás Maduro, i ka dërguar një letër presidentit kinez, Xi Jinping, në të cilën kërkonte detektorë radarësh dhe përmendi drejtpërdrejt “përshkallëzimin” e situatës me SHBA-në.
Gjithashtu, KaraCAS thuhet se i ka kërkuar Iranit të furnizojë pajisje për bllokimin e radarëve dhe dronë të aftë për të fluturuar deri në 1,000 kilometra larg. Dokumente të cituara nga Washington Post tregojnë se ministri i Transportit i Venezuelës, Ramón Celestino Velázquez, pritet t’i dorëzojë një letër presidentit rus, Vladimir Putin, gjatë udhëtimit të tij në Moskë muajin e kaluar. Në letër, Venezuela kërkon raketa të paspecifikuara dhe ndihmë për riparimin e avionëve luftarakë Su-30MK2 dhe sistemeve të radarëve të blerë më parë.
Raporti shtoi se nuk është e qartë nëse Rusia, Kina apo Irani i janë përgjigjur këtyre kërkesave.
Presidenti i SHBA-së, Donald Trump, ka akuzuar Maduron se drejton kartele “makro-terroriste” që kontrabandojnë drogë në SHBA dhe ka ofruar një shpërblim për arrestimin e tij. Uashingtoni ka dërguar një flotë detare në Karaibe perëndimore dhe që nga shtatori ka kryer operacione në ujëra ndërkombëtare kundër mbi një duzinë anijesh të dyshuara se janë pjesë e kartelit.
Maduro ka mohuar akuzat dhe e ka akuzuar Trumpin për “fabrikim të një lufte të re”.