Titulli: Video satirike nga Moska: Zelensky si Babagjyshi që vjedh dhuratat, Evropa fajëson Putinin për gjithçka
Moska ka zgjedhur një mënyrë origjinale për të ironizuar Bashkimin Europian. Një reklamë satirike për Krishtlindje, publikuar në televizionin shtetëror rus, vë në lojë politikën europiane, e cila, sipas rusëve, për çdo gjë fajëson presidentin Vladimir Putin.
Në këtë spot, presidenti ukrainas Volodymyr Zelensky paraqitet si Babagjyshi i Vitit të Ri, i veshur me ngjyra blu dhe me simbole ukrainase. Përreth tij shihen politikanë europianë dhe gazetarë të njohur, versione të redaktuara me Inteligjencë Artificiale, të cilët marrin pjesë në një event muzikor festiv.
Të gjithë këta personalitete përsëritin me sarkazëm se çdo problem, nga ekonomia te siguria, është “faji i Putinit”. Skenat në video ilustrojnë imazhe që lidhen me krizën energjetike dhe pasigurinë sociale: fatura të larta për energjinë elektrike, familje të varfëra, tavolina festive të shtrenjta dhe emigrantë, të cilët duket se janë ulur nën pemën e Krishtlindjeve.
Mesazhi kryesor i videos synon ta paraqesë Evropën si të ngecur në një narrativë të fajësimit kolektiv të Rusisë për çdo problem të brendshëm.
Në kulminacionin e spotit, shfaqet “Zelensky – Babagjyshi” duke vjedhur dhuratat e fëmijëve, ndërkohë që vështron me ironi kamerën. Kjo skenë pasohet nga fraza: “Edhe kjo është për shkak të Putinit”.
Videoja mbyllet me një familje evropiane që shikojnë televizor, ku prezantuesit dhe komentatorët përsëritin të njëjtin rrëfim. Më pas dëgjohet thirrja e fundit: “Të dashur evropianë, ruani besimin tuaj të verbër te Babagjyshi i Vitit të Ri”.