Rëndohet bilanci: Mbi 900 viktima nga përmbytjet në Indonezi, qindra të tjerë të zhdukur
Numri i viktimave nga përmbytjet shkatërruese në Indonezi ka kaluar 900, ndërsa qindra persona të tjerë rezultojnë ende të zhdukur. Përmbytjet ndodhën pasi një ciklon jashtëzakonisht i fuqishëm u formua mbi Ngushticën e Malakës javën e kaluar, duke sjellë shira të rrëmbyshëm dhe rrëshqitje masive balte në disa rajone të vendit.
Mbi 100,000 shtëpi janë shkatërruar, duke lënë komunitete të tëra të izoluara. Ekipet e emergjencës po punojnë për të arritur zonat më të prekura, shumë prej të cilave mund të furnizohen vetëm nga ajri. Ushtria dhe shërbimet e shpëtimit kanë nisur hedhjen e ndihmave nga helikopterët, ndërsa rrugët tokësore vazhdojnë të jenë të paarritshme.
Përmbytjet në Indonezi janë vetëm një pjesë e një serie ngjarjesh ekstreme të motit që kanë goditur Azinë Juglindore në javët e fundit. Në total, numri i viktimave në Sri Lanka, Tajlandë, Malajzi dhe Vietnam po i afrohet 2,000.