“Jemi pranë Kievit”, Von der Leyen: Paqja në Ukrainë duhet të arrihet sipas kushteve të Kievit
Presidentja e Komisionit Evropian, Ursula von der Leyen, ka mbërritur në Kiev për herë të dhjetë që nga fillimi i luftës. Vizita e saj synon të konfirmojë mbështetjen e palëkundur të Bashkimit Evropian ndaj Ukrainës. Ajo shoqërohet nga Presidenti i Këshillit Evropian, Antonio Costa.
Në një mesazh të publikuar në platformën X, von der Leyen theksoi se vizita ka për qëllim të përsërisë se “Evropa qëndron pranë Ukrainës, financiarisht, ushtarakisht dhe në këtë dimër të ashpër”.
Ajo shtoi: “Për të nënvizuar angazhimin tonë të vazhdueshëm ndaj luftës së drejtë të Ukrainës. Dhe për t’i dërguar një mesazh të qartë si popullit ukrainas ashtu edhe agresorit: nuk do të dorëzohemi derisa të rivendoset paqja. Paqe sipas kushteve të Ukrainës”.
Vizita vjen në një moment kur lufta ka hyrë në vitin e pestë dhe ndërsa Ukraina përballet me sfida të vazhdueshme në front dhe me vështirësi energjetike gjatë dimrit. Mesazhi i liderëve evropianë synon të forcojë unitetin e BE-së dhe të riafirmojë mbështetjen politike, ushtarake dhe financiare për Kievin.