Babai i 14-vjeçarit të vrarë në Maliq: Nuk kuptoj si u liruan familjarët e autorit
Lidhur me vrasjen e ndodhur më 15 gusht të këtij viti, ku humbi jetën 14-vjeçari Erald Xhejo nga bashkëmoshatari i tij, Enedio Guri, Gjykata e Apelit Tiranë ka vendosur lirimin nga qelia të babait dhe xhaxhait të autorit, Edison Guri dhe Roland Guri. Ata ishin të akuzuar për fshehje të krimit.
Gjykatësja e Gjykatës së Apelit, Lutfije Celami, ka ndryshuar masën e sigurisë për të dy shtetasit nga “arrest në burg” në “arrest shtëpie”.
Ndërkohë, familjarët e viktimës e kanë konsideruar këtë një padrejtësi nga ana e gjykatës dhe kërkojnë kthimin e tyre në qeli.
Edison Xhejo, babai i viktimës, u shpreh:
“Kur ishte bërë gjyqi, një nga personat e arrestuar ka qenë Florian Çela, i cili ka qenë me autorin në makinë dhe nuk e parandaloi ngjarjen; ai ishte i pari, kryesori ka qenë ky. Kur ishte bërë gjyqi, gjykata e ka lënë me arrest shtëpie. Nuk kemi dashur të japim intervista sepse sa herë flasim nuk durojmë dot. Para pak ditësh mësuam që kishte dalë edhe xhaxhai edhe i ati; i ka nxjerrë Apeli. Ne kërkojmë drejtësi. Deri dje kishim besim tek drejtësia, por nuk e di se çfarë mund të bëhet. Nuk e di argumentin, nuk ka dalë vendimi akoma, thjesht një gjyqtare nga Tirana i ka nxjerrë. Avokati tha që për 5 ditë del vendimi, ndërkohë kanë kaluar 10 ditë dhe akoma. As ne nuk e dimë përse i ka liruar.
Prokuroria kërkoi në fillim burg për të tre këta persona, kur tani marrim vesh që ishin liruar; kishin bërë kërkesë në Gjykatën e Apelit në Tiranë. Si mund ta ndjekim këtë çështje?! Vetëm me ligj, me drejtësi, në qoftë se ka drejtësi. Ju bëjmë apel institucioneve ne, sa të kemi jetë me këtë çështje do merremi. Ne kemi besim tek drejtësia, por edhe shumë jo.
Duam të merren institucionet sepse po ndodhin shumë gjëra, si rasti i djalit tonë po ndodhin shumë, ndodhi edhe ajo në Durrës, kanë ndodhur edhe të tjera. Djali kishte dalë me shokët, vajti për t’u qethur në Pirg dhe rrugës ishin ndeshur me autorin me makinë. Me ç’më thanë shokët e djalit, i kishin fishkëlluar dhe aty ishin përleshur. Nuk besoj të ishte sherr i paralajmëruar, nuk kishin çfarë ndanin, ishin fëmijë.
Jo, asnjë njeri nuk ka ardhur (nga familja e autorit), s’janë munduar. Edhe sikur të kenë dashur, çfarë do kërkojnë? Jemi shumë të shkatërruar. Të vetmin ngushëllim e kishim në drejtësi, por siç po ndodhin gjërat… nuk dimë më se ku të kemi besim dhe çfarë mund të bëhet! I ati me xhaxhain (e autorit) që fshehën armën e krimit, kishin marrë thikën, e kishin larë; nuk e di si i lirojnë këta njerëz të tillë! Ç’janë këta gjyqtarë? Nuk e di. Ne duam vetëm drejtësi, që mos i ndodhë asnjeriu kjo që na ndodhi ne.
Krahas ngjarjes, më shumë na ka tronditur edhe fakti që u liruan këta të dy. Nuk e beson asnjë njeri, gjithë rrethi ynë shoqëror thonë: “Si ka mundësi?”