“`html
Vrasja e biznesmenit në Tepelenë, dëshmia e një të afërmi: E pashë të mbuluar me gjak
Një i afërm i Çajup Selimit, i cili u vra më 1 qershor 2021 në Tepelenë, ka dëshmuar sot në Gjykatën e Posaçme. Leonard Selimi ka treguar se Çajup Selimi ishte një njeri punëtor dhe i qetë, i njohur për aktivitetin e tij në tregtinë e çimentos, por nuk ishte pjesë e asnjë konflikti publik.
Leonardi shtoi se pas vrasjes u informuan për disa mosmarrëveshje që viktima kishte pasur me disa të rinj nga fshati Veliqot i Tepelenës. Megjithatë, këto sherre ishin zgjidhur para ngjarjes dhe nuk japin shpjegim për vrasjen.
“Kur ndodhi vrasja, unë isha në shtëpi. Poshtë katit tim, ishte data 1 qershor, rreth orës 21:00. Nuk dëgjova zhurmë dhe as nuk e pashë autorin. Hapa derën sepse më ra plumbi te dera. Nuk dëgjova krisma armësh. Gjeta plumbin brenda në shtëpi, te koka e krevatit. Ia dhashë të nesërmen policisë,” ka rrëfyer ai.
Leonard Selimi ka vazhduar duke thënë:
- “Atë natë nuk kisha parë asgjë. Pashë vetëm vrimën në derë.
- Kur dola te dera pashë gjak. U mundova t’i jap ndihmën e parë.
- I dilte gjak nga goja, nuk kishte reagim nga ana e tij.
- Doli nusja e tij, pastaj dikush nga kati i parë dhe të gjithë të tjerët.
- E mora vesh nga televizioni.
Ai e përshkroi viktimën si:
- “Një djalë punëtor, djalë të qetë.
- Shiste çimento, kishte magazinë.
- Në kafe ai nuk ulej kurrë me ne, por bisedonim gjëra të rinjsh.
- Para se të vritej, nuk dinim asgjë për të.
- Pasi u vra, morëm vesh që kishte probleme.
- Kishte sherre me disa çuna nga fshati Veliqot i Tepelenës, emrat nuk i di, por si fytyra i njoh. Janë tre çuna, kanë bërë një ose dy sherre. Ishin rregulluar pastaj dhe erdhën te varrimi. Ishte mbyllur sherri.
- Për ndonjë sherr tjetër të hapur nuk di gjë.
- Nuk i jap dot shpjegim vrasjes,” ka deklaruar Selimi.
Për këtë vrasje, i penduari i drejtësisë Artan Tafani ka deklaruar se është paguar 25 mijë euro nga Laert Haxhiu. Tafani ka treguar se kur e vrau biznesmenin Selimi, viktima e kishte parë në sy teksa ai e qëllonte, pa e ditur se ku po e kapnin plumbat.
“`