“`html
Vrasja e Fatbardh Licit: Familja Bajra në gjyq si “grup i strukturuar kriminal”
SPAK (Prokuroria e Posaçme kundër Korrupsionit dhe Krimit të Organizuar) ka përfunduar hetimet për vrasjen e Fatbardh Licit, ngjarje e ndodhur në Shkodër në gusht të vitit 2018. Katër persona janë dërguar për gjykim, të akuzuar si pjesëtarë të një grupi të strukturuar kriminal.
Në qendër të akuzës është Behar Brajoviq, i cili sipas Prokurorisë ka organizuar ekzekutimin së bashku me Safet Rustemin dhe Astmer Bilalin. Ndërsa Eria Ago akuzohet për përkrahje të autorëve pas krimit.
Prokuroria e Posaçme sqaron se vrasja lidhet me konfliktet e vjetra mes dy familjeve të forta të zonës dhe me përshkallëzimin e ngjarjeve kriminale që tronditën Shkodrën atë vit. Konkretisht, ngjarja lidhet me vrasjen e Boran Bërçanës dhe Silvi Ndocit, ekzekutimin e të cilëve, sipas familjes Bajra, e kishte kryer Ibrahim Lici.
Njoftimi i SPAK
Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka paraqitur pranë Gjykatës së Posaçme të Shkallës së Parë kërkesën për gjykimin e procedimit penal nr. 112/2019. Të pandehurit dhe akuzat janë si më poshtë:
- Behar Brajoviq: Akuzuar për “Vrasje me paramendim” kryer për hakmarrje në dëm të Fatbardh Licit, kryer në formën e bashkëpunimit si pjesë e një grupi të strukturuar kriminal; “Grupi i strukturuar kriminal”; “Mbajtje pa leje e armëve luftarake” kryer në formën e bashkëpunimit si pjesë e një grupi të strukturuar kriminal; “Drejtim i grupit të strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”. Parashikuar nga nenet 78/2 e 28/4, 278/1 e 28/4; 333a/1 dhe 334/1/2 të Kodit Penal.
- Safet Rustemi: Akuzuar për “Vrasje me paramendim” kryer për hakmarrje në dëm të Fatbardh Licit, kryer në formën e bashkëpunimit si pjesë e një grupi të strukturuar kriminal; “Grupi i strukturuar kriminal”; “Mbajtje pa leje e armëve luftarake” kryer në formën e bashkëpunimit si pjesë e një grupi të strukturuar kriminal; “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”. Parashikuar nga nenet 78/2 e 28/4, 278/1 e 28/4; 333a/2 dhe 334/1/2 të Kodit Penal.
- Astmer Bilali: Akuzuar për “Vrasje me paramendim” kryer për hakmarrje në dëm të Fatbardh Licit, kryer në formën e bashkëpunimit si pjesë e një grupi të strukturuar kriminal; “Grupi i strukturuar kriminal”; “Mbajtje pa leje e armëve luftarake” kryer në formën e bashkëpunimit si pjesë e një grupi të strukturuar kriminal; “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”. Parashikuar nga nenet 78/2 e 28/4, 278/1 e 28/4; 333a/2 dhe 334/1/2 të Kodit Penal.
- Eria Ago: Akuzuar për “Përkrahja e autorit të krimit”, e kryer në lidhje me veprën penale 333/a të këtij Kodi. Parashikuar nga neni 302/2 i Kodit Penal.
Rrethanat e ngjarjes
Prokuroria e Posaçme kundër Korrupsionit dhe Krimit të Organizuar, mbi bazën e akteve hetimore të dërguara nga Prokuroria pranë Gjykatës së Shkallës së Parë për Krime të Rënda, ka regjistruar procedimin penal nr. 112 të vitit 2019. Hetimet lidhen me veprat penale si “Vrasje me paramendim e kryer në bashkëpunim”, “Rrëmbimi ose mbajtja peng e personit, e kryer në bashkëpunim”, “Mbajtja pa leje e prodhimit të armëve, lëndëve shpërthyese dhe municionit” dhe “Grupi i strukturuar kriminal”, parashikuara nga nenet 78-25, 79/ë-25, 109-25, 197, 278, 279 dhe 333/a të Kodit Penal.
Hetimet në kuadër të këtij procedimi janë zhvilluar lidhur me disa ngjarje kriminale të ndodhura në qytetin e Shkodrës në vitin 2018. Nga tërësia e provave të grumbulluara rezulton e provuar se mes të pandehurve dhe familjes Lici kanë ekzistuar konflikte të hershme, të lidhura kryesisht me kontrollin e territorit të qytetit të Shkodrës, të shoqëruara me ngjarje kriminale.
Pas vrasjes së shtetasve Boran Bërcana dhe bashkëshortes së tij Silvi Ndoci (të njohur të të pandehurve) në korrik të vitit 2018, në Shkodër, i pandehuri Behar Brajoviq ia ka atribuar këtë vrasje shtetasit Ibrahim Lici, nipit të shtetasit Fatbardh Lici.
Në vijim të dinamikës së këtyre ngjarjeve, i pandehuri Behar Brajoviq, në bashkëpunim të veçantë me të pandehurit Safet Rustemi dhe Astmer Bilali, kanë organizuar dhe vrarë në datën 10.08.2018, në Shkodër, shtetasin Fatbardh Lici, xhaxhain e shtetasit Ibrahim Lici. Ekzekutori i drejtpërdrejtë ka qenë i pandehuri Astmer Bilali.
Të pandehurit Safet Rustemi dhe Astmer Bilali kanë përdorur një automjet të vjedhur, të markës “Benz”, ngjyrë gri me targa AA 760FX. Ata janë afruar pranë lokalit të shtetasit Sokol Lici, ku viktima Fatbardh Lici, i cili ishte vëllai i Sokol Licit dhe xhaxhai i Ibrahim Licit, shkonte pothuajse çdo ditë në të njëjtën orë për të pirë kafe. Viktima ka qenë ulur jashtë lokalit dhe pasi automjeti është afruar pranë tij, nga dera e pasagjerit ka zbritur i pandehuri Astmer Bilali, i cili ka qëlluar me armë zjarri në drejtim të tij, duke e lënë të vdekur. Më pas, automjeti është larguar në drejtim të zonës së Dobraçit, është futur në një kthesë pranë banesës së të pandehurit Safet Rustemi dhe më pas është kthyer dhe larguar. Automjeti është djegur po në zonën e Dobraçit.
Pas kryerjes së vrasjes, i pandehuri Safet Rustemi ka qëndruar në Shkodër, ndërsa i pandehuri Astmer Bilali është larguar menjëherë drejt Tiranës, së bashku me të pandehurën Eria Ago, e cila rezulton të ketë përkrahur autorët pas kryerjes së vrasjes.
“`