Sherri për lojërat elektronike përfundon në tragjedi: 19-vjeçari vret vëllanë dhe njofton policinë.
Një mbrëmje argëtimi me videolojëra në një banesë në Oklahoma mori një kthesë tragjike, pasi një 19-vjeçar dyshohet se vrau vëllanë e tij më të madh pas një konflikti që shpërtheu gjatë lojës.
Sipas mediave lokale, William Spencer, 19 vjeç, dhe vëllai i tij 25-vjeçar, Nicholas Spencer, po luanin videolojëra së bashku mbrëmjen e së dielës, kur i riu u zemërua dhe u përfshi në një përleshje me vëllain.
Konflikti përshkallëzoi në dhunë fizike, ku William dyshohet se e goditi Nicholas me thikë, duke i shkaktuar plagë fatale. Pas ngjarjes, 19-vjeçari ka telefonuar vetë autoritetet për të deklaruar se kishte therur vëllanë.
Policia e Oklahomës bëri të ditur se oficerët mbërritën në vendngjarje dhe gjetën një burrë me plagë të rënda nga thika. “Telefonuesi na njoftoi se sapo kishte therur vëllanë e tij. Kur mbërritëm, gjetëm viktimën të plagosur rëndë,” deklaroi policia.
Nicholas Spencer u transportua me urgjencë në spital nga paramedikët, por nuk arriti t’u mbijetojë plagëve dhe u shpall i vdekur.
Rreshteri Gary Knight e cilësoi ngjarjen si “jashtëzakonisht tragjike”, duke theksuar se konflikti nisi gjatë një loje. “Dy vëllezër po luanin videolojëra. Njëri u zemërua dhe sulmoi tjetrin, duke i marrë jetën,” tha ai.
William Spencer u arrestua në vendin e ngjarjes dhe u dërgua në Qendrën e Paraburgimit të Qarkut të Oklahomës. Sipas autoriteteve, ai ka pranuar përfshirjen në krim dhe po përballet me akuza për vrasje të shkallës së parë.
19-vjeçari mbahet në paraburgim me një garanci prej 10 milionë dollarësh, ndërsa hetimet për rrethanat e plota të ngjarjes vijojnë.