“`html
Vuçiç: Shteti nuk është i përfshirë në posedimin e pesë tonëve marihuanë
Presidenti i Serbisë, Aleksandar Vuçiç, deklaroi më 1 shkurt se shteti nuk ka asnjë lidhje me rastin e zbuluar pas kapjes së pesë tonëve marihuanë në pronën e një zyrtari lokal të Partisë Përparimtare Serbe (SNS), parti në pushtet.
Ai theksoi se policia ka arrestuar persona dhe se kundërshtarët politikë po përpiqen ta paraqesin shtetin si të përfshirë në këtë çështje, duke e kthyer situatën mbrapsht.
“Njerëzit nga Policia gjetën pesë tonë të një lloj droge. Tani, nëse vetëm djali e ka ditur për këtë apo të dy, edhe djali edhe babai, kjo është çështje tjetër, le ta vendosin autoritetet kompetente, nuk dua të pretendoj asgjë. Ne e kemi kryer atë operacion”, tha Vuçiq për Televizionin Pink.
Më 29 janar, Policia e Serbisë, në bashkëpunim me Zyrën e Prokurorit për Krim të Organizuar, konfiskoi pesë tonë marihuanë në zonën e fshatit Konjuh, afër Krushevcit, në Serbinë qendrore.
Të dyshuar në këtë rast janë Aleksandar Mijajlloviq, Nebojsha Spasojeviq, Rade Spasojeviq, Ivan Dragniq dhe Urosh Mlladenovski. Autoritetet kanë kërkuar lëshimin e një fletarrestimi, përfshirë edhe atë ndërkombëtar, për Aleksandar Mijajlloviqin, i cili është identifikuar si organizator i grupit kriminal dhe aktualisht është në arrati.
Sipas autoriteteve serbe, grupi ka vepruar në nivel ndërkombëtar dhe ka përvetësuar pesë tonë marihuanë në territorin e Maqedonisë së Veriut gjatë muajit janar.
Presidenti i Lëvizjes Popullore të Serbisë, një parti opozitare, Mirosllav Aleksiq, deklaroi përmes një postimi në X (ish-Twitter) se njëri nga personat e arrestuar gjatë sekuestrimit të drogës ishte këshilltar i Partisë Përparimtare Serbe në Krushevc. Aleksiq shtoi se personi i arrestuar është “mik dhe ndihmës i ngushtë” i familjes së ministrit të Mbrojtjes, Bratisllav Gashiq.
Ministri Gashiq nuk ka bërë koment mbi akuzat dhe as nuk e ka përmendur emrin e personit të arrestuar. Në një deklarim të publikuar në gazeta serbe, ai përgëzoi autoritetet policore dhe të sigurisë për aksionin, duke theksuar se veprime të tilla tregojnë se “nuk ka njerëz të mbrojtur në Serbi”.
“`