Vuçiç: Serbia do të ngrejë kupolë mbrojtjeje ajrore për t’u përgatitur për luftë
Presidenti serb, Aleksandar Vuçiç, deklaroi se vendi i tij duhet të forcojë ushtrinë, duke theksuar se vendet europiane po përgatiten për një konflikt të mundshëm ushtarak me Rusinë. Ky qëndrim vjen pas komenteve të Shefit të Shtabit të Përgjithshëm të Forcave të Armatosura Franceze, Fabien Mandon, i cili pohoi se ushtria franceze duhet të jetë gati për një përballje me Rusinë brenda tre deri në katër vjetësh.
“Ndërsa analizoj faktet, arrij në përfundimin se një luftë midis Europës dhe Rusisë po bëhet gjithnjë e më e dukshme. Këto nuk janë fjalë boshe, të gjithë po përgatiten për të,” u shpreh Vuçiç.
Sipas tij, Serbia gjendet në një pozicion të vështirë mes objektivave kontradiktore të ndjekura nga vendet perëndimore dhe Rusia. Kreu i shtetit serb insistoi se vendi duhet të vazhdojë të forcojë forcat e armatosura për vetëmbrojtje.
“Në këtë kuptim, ne duhet të përgatitemi. Ne duhet të vazhdojmë të investojmë shumë dhe të punojmë në mënyrë që të mund ta mbrojmë më tej vendin, të forcojmë forcat tona për mbrojtjen ajrore, mbi të gjitha të përpiqemi të ndërtojmë një lloj kupole mbrojtëse mbi Serbinë, gjë që është shumë e vështirë dhe kërkon shumë para,” tha Vuçiç.
Beogradi ka investuar ndjeshëm vitet e fundit në modernizimin e ushtrisë, duke blerë tanke, helikopterë, avionë dhe sisteme të mbrojtjes ajrore.