“`html
Një hap i madh drejt kuptimit të origjinës së jetës: Çfarë zbuloi NASA në asteroidin ‘Bennu’
Në një zbulim që mund të ndryshojë mënyrën se si shkenca e kupton fillimin e jetës në Tokë, NASA njoftoi se misioni OSIRIS-REx ka sjellë në Tokë mostra nga asteroidi Bennu, të cilat përmbajnë sheqerna thelbësorë për jetën, duke përfshirë ribozën dhe glukozën.
Një ekip ndërkombëtar shkencëtarësh, i udhëhequr nga profesori Yoshihiro Furukawa i Universitetit Tohoku në Japoni, konfirmoi se riboza, një sheqer me pesë atome karboni i domosdoshëm për sintezën e ARN-së, është e pranishme në materialin e Bennu-së. Megjithëse riboza është identifikuar më parë në meteoritë që kanë rënë në Tokë, kjo është hera e parë që ajo zbulohet drejtpërdrejt në një mostër të marrë nga një asteroid.
Sipas Furukawa-s, “zbulimi i ribozës do të thotë se të gjithë përbërësit kryesorë për ndërtimin e ARN-së gjenden në Bennu.” Kjo mbështet teorinë e “universit të ARN-së”, e cila sugjeron se ARN-ja ishte molekula e parë që bartte informacione gjenetike dhe katalizonte reaksione kimike shumë përpara ADN-së.
Përveç sheqernave, shkencëtarët gjetën edhe një material ngjitës organik të pazakontë, i quajtur joformalisht “çiçakëz hapësinor”, i cili përmbante azot dhe oksigjen. Ky material u krijua nga proceset termike në shkëmbin e lashtë mëmë të Bennu-së dhe mund të ketë luajtur rol në formimin e molekulave komplekse organike në Tokën e hershme. Scott Sanford nga Qendra Kërkimore Ames theksoi se ky material mund të përfaqësojë një nga transformimet më të vjetra kimike të diktuara nga një asteroid, duke ofruar një dritare të rrallë në kimisë e sistemit diellor primitiv.
Mostrat nga Bennu përmbanin gjithashtu sasi të pazakonta të materialit të prodhuar nga shpërthimet e supernovave, rreth gjashtë herë më shumë se sa pritej. Kjo zbulon informacione të çmuara për proceset që formuan sistemin tonë diellor rreth 4.6 miliardë vjet më parë.
Asteroidi Bennu, i cili i afrohet Tokës çdo gjashtë vjet, mbetet një nga objektet më të studiuara në hapësirë për shkak të përbërjes së tij primitive dhe rëndësisë shkencore. Pavarësisht vlerës shkencore, Bennu përbën gjithashtu një rrezik të vogël: NASA paralajmëron se ekziston një shans 1 në 2,700 që asteroidi të godasë Tokën në vitin 2182. Megjithatë, ekspertët theksojnë se këto probabilitete mund të ndryshojnë me studime të mëtejshme.
“`