Zelensky: Garancitë e Sigurisë Amerikane Duhet të Vijnë Para Kompromiseve të Ukrainës
Presidenti ukrainas Volodymyr Zelensky ka deklaruar se Shtetet e Bashkuara të Amerikës i kanë kërkuar Ukrainës të heqë dorë nga pretendimet territoriale ndaj zonave të pushtuara nga Rusia, duke ofruar në këmbim garanci sigurie.
“Miqtë tanë amerikanë po përgatisin garanci sigurie. Por ata thanë, së pari ky shkëmbim territoresh, ose diçka e tillë, dhe pastaj garancitë e sigurisë. Unë besoj se garancitë e sigurisë duhet të vijnë të parat”, tha ai të hënën.
Zelensky shtoi se Ukraina është e gatshme të bëjë kompromis, por kjo nuk do të thotë se do të heqin dorë nga territoret e tyre. “Çfarë kompromisi jemi të gatshëm të bëjmë? Jo një që do t’i lejojë Rusisë të rikuperohet shpejt dhe të vijë përsëri dhe të na pushtojë”, theksoi ai.
Presidenti ukrainas kujtoi se Ukraina kishte marrë garanci sigurie në Memorandumin e Budapestit të vitit 1994. Sipas këtij memorandumi, Kievi pranoi të hiqte dorë nga armët bërthamore sovjetike të vendosura në territorin e saj pas shpërbërjes së BRSS-së.
“Ne hoqëm dorë nga armët tona bërthamore dhe të tjera. Shumë aeroplanë, dhjetëra. Ne i hoqëm dorë prej tyre dhe morëm garanci sigurie, sovraniteti dhe pavarësie. Në fund të fundit, nuk kemi asnjë nga ato armë dhe nuk kemi garanci sigurie. Askush nuk e mbrojti pavarësinë tonë”, u shpreh ai.
Ai shtoi se çdo garanci e re sigurie do të hyjë në fuqi vetëm pas një votimi në Kongres.
Ndërkohë, Kremlini ka bërë të ditur se negociatat e Gjenevës për Ukrainën do të mbulojnë një gamë më të gjerë temash krahasuar me raundet në Abu Dhabi, përfshirë çështjet kryesore që lidhen me territoret.
Duke folur në një konferencë shtypi në Moskë, zëdhënësi i Kremlinit, Dmitry Peskov, tha se diskutimi i këtyre çështjeve kërkon praninë e kreut të delegacionit rus, i cili mungonte në bisedimet në Emiratet e Bashkuara Arabe.
“Këtë herë synohet të diskutohet një spektër më i gjerë çështjesh, duke përfshirë, në fakt, çështjet kryesore që kanë të bëjnë si me territoret ashtu edhe me gjithçka tjetër. Këto lidhen me kërkesat tona. Këtu na duhet prania e kryenegociatorit, përkatësisht Vladimir Medinsky”, tha ai.