Raundi i dytë i zgjedhjeve komunale në Francë shoqërohet me ngjarje tragjike: 3 persona humbin jetën në qendrat e votimit
Raundi i dytë i zgjedhjeve komunale në Francë është shënuar nga ngjarje tragjike, pasi tre persona kanë ndërruar jetë gjatë procesit të votimit të së dielës.
Në Saint-Étienne, një kandidat i partisë Rassemblement National (RN), i cili ishte pjesë e listës së drejtuar nga Corentin Jousserand, humbi jetën pas një ataku në zemër teksa shërbente si përfaqësues në një qendër votimi. Pavarësisht përpjekjeve të ekipeve të emergjencës për rreth një orë, jeta e tij nuk mundi të shpëtohej, ndërsa qendra e votimit u mbyll për tre orë.
Dy raste të tjera fatale u regjistruan në qytetet Carcassonne dhe Annecy.
Në Carcassonne, një grua 82-vjeçare u ndje keq pak para se të hynte në qendrën e votimit dhe ndërroi jetë në ambulancë gjatë transportit, pavarësisht ndërhyrjes së shpejtë të zjarrfikësve.
Ndërkohë, në Annecy, një burrë 81-vjeçar pësoi një atak në zemër dhe u rrëzua në momentin që po votonte në një palestër. Përpjekjet për ta rikthyer në jetë rezultuan të pasuksesshme. Si pasojë e këtyre ngjarjeve, tre qendra votimi në zonë u mbyllën për më shumë se një orë.
Këto ngjarje kanë hedhur një hije zie mbi procesin zgjedhor në Francë, ndërsa autoritetet kanë shprehur ngushëllime për familjarët e viktimave.