Zjarr në një ndërtesë të braktisur në Romë, një i plagosur
Një zjarr ka përfshirë një ndërtesë të braktisur në Romë, duke lënë një person të plagosur. Një nga banorët e ndërtesës së braktisur, e cila ndodhet në Via Cesare Tallone, në zonën Collatina, në periferi të Romës, është dërguar në spital pasi u lëndua gjatë përpjekjeve për t’i shpëtuar flakëve që morën peng godinën në orët e para të mëngjesit të sotëm.
Në vendngjarje kanë mbërritur menjëherë forcat zjarrfikëse dhe policia. Ata kanë evakuuar pa vonesë personat që ndodheshin brenda ndërtesës së përfshirë nga zjarri. Operacionet për shuarjen e flakëve janë ende në proces.
Deri tani nuk është përcaktuar shkaku i shpërthimit të zjarrit. Autoritetet kanë nisur hetimet për të zbardhur rrethanat e ngjarjes.