Tre persona janë arrestuar pas një zjarri shkatërrues në një rrokaqiell në Hong Kong, ku të paktën 44 persona kanë humbur jetën dhe qindra të tjerë rezultojnë ende të zhdukur.
Zyrtarët njoftuan se të paktën 44 persona vdiqën si pasojë e një zjarri masiv që përfshiu disa ndërtesa të larta apartamentesh në një kompleks banimi në Hong Kong. Ndërkohë, qindra banorë rezultojnë ende të zhdukur, ndërsa zjarrfikësit vazhdojnë përpjekjet për të gjetur banorë të bllokuar në katet e sipërme.
Një zëdhënës i policisë tha se tre burra janë arrestuar me dyshimin për vrasje të paqëllimshme lidhur me zjarrin. Gjatë një konference për shtyp, policia i akuzoi të tre për “neglizhencë të rëndë”.
Hetimet fillestare të policisë zbuluan emrin e kompanisë së ndërtimit në dërrasat e polistirenit të ndezshëm, të cilat zjarrfikësit gjetën duke bllokuar disa dritare në kompleksin e apartamenteve. Zyrtarët shtuan se dyshohet se materiale të tjera ndërtimi të gjetura në apartamente, duke përfshirë rrjeta mbrojtëse, kanavacë dhe fletë plastike, nuk kanë përmbushur standardet e sigurisë.
Shkaku i saktë i përhapjes së shpejtë të zjarrit do të hetohet nga një grup pune i policisë së Hong Kongut. Megjithatë, zjarrfikësit kanë ngritur tashmë alarmin për një faktor kryesor. Shefi i zjarrfikësve, Andy Yeung, tha se gjatë operacionit të shpëtimit, ekipi i tij gjeti disa dërrasa polistireni që bllokonin dritaret e disa apartamenteve. “Këto dërrasa polistireni janë jashtëzakonisht të ndezshme dhe zjarri u përhap shumë shpejt,” theksoi ai.
Autoritetet raportojnë se të paktën 279 persona rezultojnë të zhdukur pas zjarrit që përfshiu rrokaqiejt me mijëra apartamente në lagjen Tai Po të Hong Kongut. Numri i të plagosurve arrin në 29, nga të cilët shtatë janë në gjendje kritike.