57 eurodeputetë kundër Meloni: Projekti i Gjadrit shkel ligjin BE
Projekti për qendrën e mbajtjes së emigrantëve në Gjadër, Shqipëri, i propozuar nga Kryeministrja italiane Giorgia Meloni, ka hasur kundërshtime të forta nga 57 eurodeputetë. Ata i kanë bërë thirrje Komisionit Evropian të ndërmarrë veprime kundër asaj që ata e quajnë shkelje serioze nga qeveria italiane, duke përfshirë nisjen e procedurave të penalizimit.
Në një letër të përbashkët, eurodeputetët nga grupe të ndryshme politike, si S&D, të Gjelbrit dhe të Majtët, si dhe partitë opozitare italiane, i kërkojnë Komisionerit për Çështjet e Brendshme dhe Migracionin, Magnus Brunner, të reagojë. Ata argumentojnë se Giorgia Meloni ka shkelur ligjin evropian me këtë projekt, duke krijuar një sistem menaxhimi migracioni që nuk respekton juridiksionin evropian, përfshirë riatdhesimet nga territori shqiptar.
Ky model, sipas tyre, minon sundimin e ligjit, është jashtëzakonisht i kushtueshëm dhe krijon një “zonë gri” ku migrantët privohen nga mbrojtjet ligjore.
Eurodeputetët theksojnë se Gjykata Evropiane e Drejtësisë tashmë ka konfirmuar papajtueshmërinë e këtij modeli me ligjin e BE-së, dhe Gjykata Italiane e Kasacionit ka kërkuar gjithashtu një vendim mbi legjitimitetin e qendrave të tilla.
Pavarësisht se Komisioni Evropian është në dijeni të operacioneve, eurodeputetët shprehen të pakënaqur me qëndrimin e tij pasiv, duke e konsideruar atë si “bashkëfajësi për shkak të inercisë”. Ata kërkojnë veprime konkrete për të mbrojtur traktatet dhe besueshmërinë e Bashkimit Evropian si një zonë lirie, demokracie dhe sundimi të ligjit.
