Trump Miraton Ndërtimin e Një Nëndetëseje Bërthamore në Korenë e Jugut
Presidenti i Shteteve të Bashkuara, Donald Trump, njoftoi përmes një postimi në platformën Truth Social se i ka dhënë miratimin Koresë së Jugut për të ndërtuar një nëndetëse me energji bërthamore.
Trump, i cili ndodhet në qytetin Gyeongju për samitin e Bashkëpunimit Ekonomik Azi-Paqësor (APEC), bëri të ditur gjithashtu se Seuli ka rënë dakord të blejë sasi të konsiderueshme nafte dhe gazi natyror nga SHBA-të.
“Koreja e Jugut do të ndërtojë nëndetësen e saj bërthamore në kantieret detare të Filadelfias, pikërisht këtu në SHBA-në e mirë të vjetër. Industria e ndërtimit të anijeve në vendin tonë së shpejti do të bëjë një përparim të madh”, shkroi Trump.
Presidenti amerikan dhe homologu i tij i Koresë së Jugut, Lee Jae-myung, finalizuan detajet e një marrëveshjeje dypalëshe tregtare gjatë takimit të tyre të zhvilluar dje. Lee gjithashtu kërkoi leje nga SHBA-ja që Koreja e Jugut të ripërpunojë karburantin bërthamor për të furnizuar me energji nëndetëset, në mënyrë që ato të mund të gjurmojnë anijet e Koresë së Veriut dhe Kinës për periudha më të gjata kohore.
Sipas një marrëveshjeje ekzistuese mes dy vendeve, Koreja e Jugut nuk ka të drejtë të ripërpunojë pa pëlqimin e Shteteve të Bashkuara.
“U kam dhënë atyre miratimin për të ndërtuar një nëndetëse me energji bërthamore, në vend të nëndetëseve të vjetruara dhe shumë më pak fleksibile me naftë që kanë aktualisht”, theksoi Trump në postimin e tij në Truth Social.
Për t’u bërë pjesë e grupit “Balkanweb”, mjafton të klikoni këtu dhe kërkesa do t’ju aprovohet menjëherë.