Trump shpall fitoren kundër ‘mashtrimit’ për klimën pas komenteve të Bill Gates
Presidenti amerikan Donald Trump shpalli të mërkurën fitoren e tij mbi atë që ai e quajti “mashtrim” të ndryshimeve klimatike, pas deklaratave të filantropistit miliarder Bill Gates se një botë në ngrohje nuk do të çonte në fundin e qytetërimit.
“Unë (NE!) sapo fituam Luftën kundër Mashtrimit të Ndryshimeve Klimatike. Bill Gates më në fund pranoi se kishte GABUAR plotësisht për këtë çështje”, shkroi Trump në platformën e tij Truth Social. “Kërkoi guxim për ta bërë këtë, dhe për këtë jemi të gjithë mirënjohës”.
Bashkëthemeluesi i Microsoft, Gates, në një memo të gjatë këtë javë, tha se ndryshimi i klimës “nuk do të çojë në zhdukjen e njerëzimit”, duke u parë si një ndryshim i dukshëm nga ana e 70-vjeçarit. Gates shtoi se, ndërsa ndryshimi i klimës do të kishte pasoja “serioze”, “njerëzit do të jenë në gjendje të jetojnë dhe të lulëzojnë në shumicën e vendeve në Tokë në të ardhmen e parashikueshme”.
Ai argumentoi se trajtimi i sëmundjeve globale dhe varfërisë do të ndihmonte në përgatitjen e më të varfërve të planetit për një botë që po ngrohet.
Gates pranoi se kritikët mund ta akuzojnë atë për hipokrizi për shkak të gjurmës së tij të konsiderueshme të karbonit ose të argumentojnë se memorandumi ishte një “mënyrë dinake për të argumentuar se nuk duhet ta marrim seriozisht ndryshimin e klimës”. Megjithatë, ai vuri në dukje përparimin e rëndësishëm në uljen e emetimeve deri më sot dhe tha se ishte optimist se teknologjia e së ardhmes do ta bënte këtë edhe më shumë.
Trump ka qenë prej kohësh një skeptik për çështjet mjedisore dhe e ka cilësuar ndryshimin e klimës si “mashtrimin më të madh ndonjëherë” në një fjalim para Asamblesë së Përgjithshme të OKB-së në shtator. Republikani ka shfuqizuar politikat e gjelbra që kur mori pushtetin në janar, pas një fushate zgjedhore fitimtare të vitit 2024, e cila mori qindra miliona dollarë nga donacionet nga kompanitë e mëdha të naftës.